Praha (kh/SN). Kapitan čěskeho narodneho koparskeho mustwa Vladimír Darida je do štwórćfinalneje partije europskich mišterstwow přećiwo Danskej zaso ze swojim mustwom trenował. Srjedźopólny hrajer zwjazkoweho ligista Hertha BSC Berlin dyrbješe wosmifinale přećiwo Nižozemskej nje­znateho zranjenja dla wuwostajić. Na treningu w měšćanskim dźělu Praha-Strahov je so nětko tež njedawno lochce zranjeny lěwy škitar Jan Bořil zaso wobdźělił.

Čěska wubranka ma swoju bazu wobmjezowanjow korony dla w Praze a po­dawa so wottam na hry. Njejasne přeco hišće je, kelko čěskich fanow pojědźe sobotu na štwórćfinale do Bakuwa. Cyłkownje 30 000 přihladowarjow je w stadionje dowolenych. „Je wšak tróšku nje­zbožowne za nas, tak daloko lećeć a potom jenož w poł połnym stadionje hrać“, praji srjedźopólny hrajer Petr Ševčík. Čěska je minjenu njedźelu před 50 000 přihladowarjemi w Budapesće ze sensacionelnym dobyćom 2:0 přećiwo Nižozemskej do štwórćfinala zaćahnyła.