Wulkotna nalada knježeše sobotu na arealu Budyskeho sportoweho towarstwa Post Germania. Tam wuhotowachu sobustawy towarstwa znowa kopańcowy turněr pěstowarnjow.
Při najrjeńšim wjedrje pokaza wjace hač 30 dźěći w sydom mustwach swój talent. Nimo mustwa hosćićelow hrajachu młodej koparce a młodźi koparjo z Budyskeju pěstowarnjow „Katolski dom dźěći“ a „Sebastian Kneipp“, z Bukečanskeje a Kubšiskeje pěstowarnje. Na kromje polow pohonješe dobre sto sotrow, bratrow, staršich, wowkow, dźědow a přećelow hłósnje palcowacu a třělacu dźěćinu. Naposled bě jenož dobyćerjow, ze słódnym lodom swjećachu wšitcy krasne dožiwjenje. Zjawny dźak słuša hłownymaj organizatoromaj Dieterej Branskyjej a Lutzej Voigtej, kotrajž hižo dołhe lěta na polu dorosta skutkujetaj a holcy a hólcow za kopańcu zahorjataj, a wězo wšěm čestnohamtskim pomocnikam.
Serbske mustwo so bohužel njewobdźěli, ale serbski hólčec z druheho mustwa Katolskeho domu dźěći bě z pjeć wrotami mjez najwuspěšnymi třělcami.