Při tak mjenowanym krimiju jědnatkow na swětowym mišterstwje kopańcy žonow je Šwedska USA 5:4 porazyła. Po bjezwrotowej regularnej hrajnej dobje, w kotrejž so wosebje Šwedska wrotarka Zećira Mušović z jednotliwymi akcijemi błyšćeše, postara so Lina Hurtig w třělenju jědnatkow wo rozsud. Tam zdaše so najprjedy US-wrotarka Alyssa Naeher z rjekowku stać. Po přetřělenymaj jědnatkomaj wot Natalie Björn a Megan Rapinoe dźeržeše hrajerka Chicago Red Stars třělwu Rebecki Blomqvist a přetwori samo sama jědnatku. Dalša misnjena třělwa Sofije Smith, kiž móžeše hru za USA rozsudźić, pak přinjese Šwedowki zaso wróćo do hry. Při rozsudnej jědnatce wot Šwedowki Hurting, móžeše Naeher bul najprjedy hišće wotwobarać, ale rotacije dozady dla přeprěči hrajny nastroj tola hišće snadnje wrotowu liniju. Ze 14. jědnatku bě rozsud padnył. Šwedska trjechi w štwórćfinalu na Japansku, mjeztym zo zakitowar titula hižo w prěnjej k.o.-hrě turněra won leći.