Awstralske koparki su na domjacym swětowym mišterstwje do połfinala zaćahnyli. Woni přewinychu Francosku 7:6 po třělenju jědnatkow. Po 120 mjeńšinach bě 0:0 stało. Kadidiatou Diani je dotal na sydom wrotach wobdźělena była a tak najwuspěšniša hrajerka WM a tež w štwórćfinalu we wupředatym stadionje w Brisbane měješe wona prěnju šansu partije, jako zmylk Alanny Kennedyjoweje wuži (8.). Wobě mustwje steještej w zakitowanju wysoko, namakaštej pak w srjedźnym polu lědma puće. Tež dołhe bule běchu husto přenjeprecizne. Najlěpša šansa Awstralčankow je po zmylku nastała. Jako běštej sej francoska wrotarka Pauline Peyraud-Magnin a škitarka Sakina Karchaoui w šěsnatce njepřezjednej, štó bul wo­zmje, reagowaše Emily van Egmond najspěšnišo a suny bul k Mary Fowlera, kotraž třěli ze šěsć metrow na prózdne wrota. Elisa De Almeida wuchowa swój team z nadkolenom před zastatkom (42.). Po tym měješe Fowler dalšu składnosć, hdyž zjewi so po přihrawce swobodnje před Peyraud-Magnin, potom pak so předołho dliješe (45.).