Přiwisnicy Łužiskich lodohokejowych liškow běchu so na štyri, snano tež pjeć, rjanych hrow w seriji best of seven přećiwo jasnemu faworitej EC Kassel Huskies nastajili. Po třoch přěhratych hrach a jednej dobytej partiji pak móžachu Běłowodźenjo naposledk wurunać a remis 3:3 docpěć. Dźensa wječor přewjedźe so w Kasselu rozsudna sedma hra wo zaćah do połfinala.

Kassel z dypkomaj prědku

Łužiske lodohokejowe liški –

EC Kassel Huskies 1:5 (0:2, 1:3, 0:0)

W pjatej mjeńšinje móžachu sej Huskije w třećinje Liškow puk wuwojować a docpěchu z wurjadnej kombinaciju 0:1 přez Yannika Valentija. Domjacy přińdźechu přez spěšne přećiwne wrota trochu z rytmusa a Kassel wuži hnydom přichodnu šansu w 7. min. Třělwa wot Louisa Bruna bu krótko před wrotami Nikita Quappa wotfalšowana a namaka tak puć do saka (0:2). Běłowodźenjo njemóžachu w prěnim wotrězku přeswědčić a buchu hakle ke kóncej strašniši.