Horcota minjenych dnjow so pominje – a to poměrnje spěšnje. Tole wěsća nam wjedrarjo. Wčerawši mejski swjedźeń steješe hišće cyle pod wliwom wyšiny „Quendolin“ z temperaturami snadnje pod 30 stopnjemi – najćoplišo bě ze 29,7 stopnjemi w badensko-württembergskim Waghäusel-Kirrlachu. Nětko pak přińdźe přewrót. Nižina „Henry“ přinjese hižo dźensa wječor chłódny a mokry powětr ze sewjera. Jutře wočakuja tež we Łužicy njewjedra, zliwki, krupy a wichor.

Rój pčołkow je wčera na Trierskim hłownym torhošću njeměr mjez ludźimi na dróze kaž tež we winarnjach a kofejownjach zbudźił. Někotři mějachu pčołki za strašne aziske šeršenje. Pčołar, kotremuž běchu wobrazy překasancow pósłali, móžeše ludźi změrować. Jednaše so woprawdźe wo pčołki, kotrež wón popadny a přesydli. Policija naměsto zaraći.

Berlin (SN). „Wot jutřišeje 1. meje je nowela zakonja wo prawje mjenow skónčnje płaćiwa!“ – Tak piše Berlinski mjeńšinowy sekretariat wčera w nowinskej zdźělence. Přisłušnicy narodnych mjeńšin móža wot nětka swoje swójbne mjeno na stawni­stwje po kulturnej a rěčnej tradiciji swojeho ludu zapisać dać. Nowelu prawa swójbnych a ródnych mjenow běše zwjazkowy sejm loni 12. apryla wobzamknył.

Mjeńšinowa rada wuzběhnje: Při změnje mjena njesmě so swoboda wu­znaća do prašenja stajić. Wuznaće k narodnej mjeńšinje ma swój zakład w Bonn-Kopenhagenskich deklaracijach z lěta 1955, w kotrychž so Němska a Danska k mjeńšinowemu prawu wuprajištej. Na wuznaću njesměš dwělować a tež přepruwowanje přisłušnosće k mjeńšinje njeje dowolene. Dóńdźe-li pak k tomu, zo stawnistwo wuznaće k narodnej mjeńšinje do prašenja staji, njech potrjecheni to bjezposrědnje mjeńšinowemu sekretariatej abo wotpowědnemu třěšnemu zwjazkej swojeje narodneje mjeńšiny zdźěla.

Hannover (dpa/SN). W delnjosakskej stolicy Hannoveru zahaja dźensa 39. němski ewangelski cyrkwinski zjězd. Po zahajacej Božej słužbje je zwjazkowy prezident Frank-Walter Steinmeier přitomnych witał. Cyrkwinski zjězd traje hač do njedźele. Na nim planuja 1 500 zarjadowanjow na wjace hač 60 městnach. Zastupny lisćik za wšón čas płaći 149 eurow. Wulkozarjadowanja su darmotne.

Mjenje ilegalnych přišło

Valencia (dpa/SN). Ličba ilegalnych za­pućowanjow do krajow Europskeje unije je po słowach prezidentki komisije EU Ursule von der Leyen jasnje woteběrała. Wot spočatka lěta su wo 30 procentow mjenje ilegalnych zapućowanjow zličili, rjekny von der Leyen na kongresu Europskeje ludoweje strony w španiskej Valenciji. To pokazuje, zo dźěło z južnymi susodami funguje. Von der Leyen žadaše sej tež wjace wotsunjenjow. Tuchwilu sćelu runje 20 procentow ludźi wróćo.

Kijew pyta bolostne dypki