Njepomhaja hižo zběžkarjam
Washington (dpa/K/SN). Prezident USA Donald Trump je zadźeržał dodawanje bróni syriskim rebelam, kotřiž wojuja přećiwo knježerstwu Bashara al-Assada. Trump je tole před njecyłym měsacom po zetkanju z direktorom CIA Mikeom Pompejom rozsudźił. CIA bě lěta 2013 za čas prezidentstwa Baracka Obamy ze zakrytym programom dodawanja bróni započała. Tajna słužba za wukraj pak wuhotowa anti-Assadskich rebelow z lochkimi brónjemi a municiju.
Politiku nowowusměrić
Berlin (dpa/SN). Jako reakciju na zajeće wojowarjow wo čłowjeske prawa a žurnalistow w Turkowskej je zwjazkowy wonkowny minister Sigmar Gabriel (SPD) připowědźił, zo politiku Turkowskej napřećo nowowusměri. To je ze zwjazkowej kanclerku Angelu Merkel (CDU) a předsydu SPD Martinom Schulzom wotrěčane, rjekny Gabriel dźensa w Berlinje. Tak radźi wonkowne ministerstwo wšitkim němskim turistam w Turkowskej, „kedźbliwiši być“. Pruwować chcedźa tež trěbnosć hospodarskeje pomocy.
Pomoc hłódnym dźeń a dróša
Ćežko wobrónjeni zastojnicy specialneje jednotki cła (ZUZ) su ...
EU hrozy Pólskej z negatiwnymi wuskutkami
Brüssel/Waršawa (dpa/SN). Komisija Europskeje unije je pólske knježerstwo namołwjała, dwělomnu justicnu reformu njezwoprawdźić. „Najnowše naprawy zamołwitych strach za prawniski stat hišće raz zesylnjeja“, rjekny wiceprezident Frans Timmermans w Brüsselu. Dyrbjeli-li zakonje płaćiwosće nabyć, by komisija hnydom reagować dyrbjała. Timmermans w tym zwisku rjekny, zo móhła komisija prěni króć w stawiznach jednanje po artiklu 7 zrěčenja EU nałožić. Tón předwidźi jako najhóršu sankciju, čłonskemu statej EU w padźe „ćežkeho a trajneho ranjenja“ w zrěčenju zakótwjenych zasadow prawo hłosowanja sćazać. To by so za Pólsku „jara negatiwnje wuskutkowało“.
Zwjazkowa kanclerka Angela Merkel (CDU) je hižo wutoru, z pólskim statnym prezidentom Andrzejom Dudu telefonowała. Při tym rěčeštaj tež wo „prawnostatnych prašenjach“, kaž rěčnik knježerstwa Steffen Seibert zdźěli. Nadrobnosće dowěrliweje rozmołwy wón njemjenowaše. Přiwšěm Němska poziciju EU wuraznje podpěruje.
Wulka wjetšina za mjeńšiny
Kiel (SN/JaW). Nowy Schleswigsko-holsteinski krajny sejm wupraji so za dalšu podpěru wobydlerskeje iniciatiwy Federalistiskeje unije europskich narodnych mjeńšin (FUEN) Minority SafePack. Kaž krajny sejm informuje, su zapósłancy wčera w Kielu wotpowědnu próstwu wšitkich frakcijow a stron jednohłósnje wobzamknyli.
„Mjeńšinowa politika njesmě so z bulom měnjatych so politiskich wjetšin stać“, potwjerdźi Birte Pauls (SPD). Iniciěrowałoj běštaj próstwu frakcija SPD a jednotliwy zapósłanc mjeńšinoweje strony SSW Lars Harms. „Mjeńšiny trjebaja spušćomnosć, kontinuitu a wěstotu“, podšmórny Pauls. Tež knježerstwowa koalicija z CDU, Zelenych a FDP próstwu podpěruje. Ministerski prezident Daniel Günther (CDU) mjenowaše iniciatiwu FUEN „jednu z najwažnišich solidarnych akcijow europskich mjeńšin zašłych lětdźesatkow“. Zdobom namołwješe wón wšitkich wobydlerjow kraja, na akciji so wobddźělić.
Zjawnje namołwjeć
Na Šumawje wjelki zachadźeli
Praha (ČŽ/HJS/K/SN). Nětko su tež na Šumawje (Böhmerwald) prěni raz wjelki zachadźeli. Nadpadnychu na pastwišću narodneho parka w susodstwje Bayerskeje wjetše stadło wowcow, z kotrychž su 19 zakusali a dalše zranili. Štyri wowcy su zhubjene. Njezranjenej wostałoj stej jenička wowca a boran, rjekny mějićel stadła Tomáš Rychecký. Stadło z boranom sewjerofriziskeje rasy a 30 wosebitymi wowcami dyrbješe jemu być zakład za plahowanje wjele mloka dawaceho skotu. Nastata škoda wučinja něhdźe 4 000 eurow, kotruž dóstanje zarunanu.
Naměstny šef Narodneho parka Šumawa Martin Starý rěči wo „nowym nazhonjenju“. W kónčinje sto lět žanych wjelkow było njeje, ale wone su „wažny wobstatk přirody“. Zo njeby k dalšim stratam mjez wowcami dóšło, chce Čěska nětko elektriske płoty testować a z nimi stadła lěpje škitać, hłownje w nocy. Zarjadnistwo narodneho parka je wočakowało, zo wjelki prjedy abo pozdźišo „zasahnu“, po tym zo běchu w měrcu powostanki wjelčicy z Bayerskeho lěsa našli.
Wotpadki so kopja
To a tamne (20.07.17)
Mać z čerstwej całtu k narodninam překwapić chcyše štyrilětny w badensko-württembergskim Gundelfingenje, je pak při tym zasadźenje policije zawinił. Pjerach bě wčera rano samlutki do wobchoda přišoł a sej całtu žadał. Předawarka pak so starosćeše a zawoła policiju. Zastojnicy hólčka na to pěši domoj přewodźachu. Mać bě za nim hižo pytała. Tón bě so skradźu z bydlenja zminył a so nětko z policiju nawróći – wězo z čerstwej całtu za mać jako narodninski dar.
Z awtom so přećisnył a dale jěł je 93lětny na zwjazkowej dróze pola Gery. Na parkowanišću njedaloko městna njezboža w Altenburgskim kraju wón skónčnje zasta. Byrnjež so po wšěm zdaću njezranił, dowjezechu jeho do chorownje. Kak je k njezbožu dóšło, njemóže sej policija tak prawje wujasnić. Muž bě z jězdnje zjěł, do wobhrodźenja prasnył a so přećisnył.
14 Palestinjanow zranjenych
Tel Aviv (dpa/K/SN). Dalše njeměry blisko Temploweje hory w Jerusalemje su sej dźensa 14 zranjenych Palestinjanow žadali. Tež policistaj poćerpještaj zranjenja. Palestinjan, trjecheny wot woclanych, z gumijom wobdatych kulkow, je ćežko zranjeny, rozprawja Palestinski čerwjeny křiž. Strona Fatah prezidenta Palestinjanow Mahmuda Abbasa je na ludnosć apelowała, přewjesć dźensa „dźeń hněwa“. Hamas a Dźihad stej tohorunja k protestam namołwiłoj.
Žada sej wjace respekta
Berlin (dpa/SN). Zwjazkowy prezident Frank-Walter Steinmeier je sej po namócnosćach w Hamburgu w zwisku z wjerškowym zetkanjom G 20 wjace respekta před policiju žadał. „Někotři su respekt před statnymi institucijemi, kaž na přikład před policiju, wočiwidnje zhubili“, rjekny wón nowinarjam. Zdobom warnowaše před alarmizmom: „Demokratija w Němskej njeje wohrožena, najebać krawale.“ Podawki w Hamburgu su jemu dopokaz, zo je stat jednanjakmany.
Wulkopósłanc USA powołany
