Awtor dźensa

Jurij Bjeńš

Na jednej stronje superstaraj kaž Ada Hegerberg a Caroline Graham Hansen, na tamnym boku jědnaće hosćićelkow z planom. Nowoseelandske koparki su při domjacym swětowym mišterstwje stawizny pisali. Hosćićelki dobychu za­zběhowu hru přećiwo Norwegskej z 1:0 a swjećachu z tym při swojim pjatym wobdźělenju swětoweho mišterstwa prěni wuspěch.

Bywša nadběhowarka zwjazkoweje ligi Hannah Wilkinson da z 42 137 přihladowarkami a přihladowarjemi pjelnjeny Eden park w Aucklandźe štwórtk wječor (čas Auckland) ze swojimi wrotami ržeć. Wuspěch „Football Ferns“, kaž so hosćićelki mjenuja, přećiwo swětowemu mištrej z lěta 1995 a dwójnemu europskemu mištrej bě wulce zasłuženy. Nowoseelandska pokaza přez cyłu distancu jima­cy bojowniski wukon a wědźeše w druhim wotrězku tež hrajersce přeswědčić.

Dalše zasadźenje za Krječmarjec

Serbska koparska sudnica Lea Krječmarjec změje jutře dalše zasadźenje w Rakecach, wot 15 hodź. sudźi wona testowu hru zastupjerja krajneje klasy prěnjeho mustwa Rakečanskeho sportoweho towarstwa. 13 hodź. přihotujetej so Kulowčenjo doma přećiwo Wojerowčanam na nowu hrajnu dobu.

22.07.  13:00  Módro-běli Kulow –

  Wojerowski FC

22.07.  15:00  Rakečanske ST –

  SZ Weißig

28.07.  19:00  SJ Njebjelčicy –

  TSV Wachau II

29.07.  14:00  Sokoł Ralbicy/Hórki –

  Wojerowski FC

30.07.  13:00  ST Radwor –

  Wojerowski FC II

Přewjedu zaso serbski Supercup

Za serbski Supercup, turněr štyrjoch serbskich koparskich cyłkow, njedźelu w Njebjelčicach je wšitko spřihotowane. Hosćićel mjeztym 6. turněra je SJ Njebjelčicy. Wobdźělić smědźa so lětsa koparske cyłki z Radworja, Njebjelčic, Pančic-Kukowa a Ralbic. Mustwo SJ Chrósćicy wusadźi, dokelž bě loni štwórte městno wobsadźiło. Połfinalnej partiji wulosować chcedźa zamołwići w 14 hodź., a turněr započnje so 14.30 hodź.

Satkula-bičtura dźe zaso dale

32 koparskich mustwow wojuje wot dźensnišeho hač do 20. awgusta w Awstralskej a Nowoseelandskej wo swětowy mišterski pokal. Po tym, zo je němske narodne mustwo žonow loni titul w finalu europskeho mišterstwa jeno snadnje skomdźiło, su wočakowanja na DFB-wubranku lětsa wulke. Ćežišćo snano budźe, zo je polo lětsa wjele šěrše. Cyłkownje 32 narodnych mustwow nastupi na swětowym mišterstwje, kotrež so wot FIFA wuhotuje. 2019 běchu jich hišće 24 mustwow. Nimo toho wotměje so turněr w Awstralskej a Nowoseelandskej, z tym eksistujetej prěni raz w stawiznach žónskeje WM dwaj krajej, kotrejž mišterstwo zhromadnje wuhotujetej. Modus při lětušim turněrje je slědowacy: Hraje so we wosom skupinach ze stajnje štyrjomi mustwami. Najlěpšej cyłkaj ze skupiny přińdźetej do wosmifinala a hrajetej w k.o.-modusu. Tak nastanje na kóncu 64 partijow, kotrež so na cyłkownje dźewjeć městnach a w dźesać stadijach wuhraja.