Balak wotnětka hłowny trenar Serbskich balokoparjow
Ballack? Ballack! Štó z aktiwnych koparjow a lubowarjow kopańcy, předewšěm z tych staršich, tele mjeno njeznaje? 44lětny Michael Ballack, rodźeny w Zhorjelcu, je dźensa znaty kopar. Wot 1994 do 2012 je wón jako profijowy kopar w mustwach Kamjenica, Kaiserslautern, Leverkusen a Bayern Mnichow kaž tež w znatym Londonskim klubje Chelsea kopački šnórował a sej z tymle sportom swój wšědny chlěb zasłužił. Cyłe sto króć je w němskej koparskej wubrance hrał a někotre lěta bě samo jeje kapitan. Dwójce wobdźěli so Michael Ballack na swětowych koparskich mišterstwach a trójce na europskich. Do statistiki toho wšeho tohorunja słuša, zo absolwowaše w horjeka mjenowanych lětach w regionalnej a wyšej lize a w prěnjej a druhej zwjazkowej lize Němskeje kaž tež w jendźelskej premierleague dohromady 604 hry, w kotrychž je 148 wrotow třělił. Wšo to je tež k tomu přinošowało, zo bu tónle sakski kopar w Němskej trójce za koparja lěta wuzwoleny.
