Na spočatku małeho róžka podachu so wolejbulisća Marijineje hwězdy do Budy­šina na swój štwórty hrajny dźeń. Z mustwom ze sewjera města kaž tež ze Šumbachskej šestku čakaštaj na klóšterskich přećiwnikaj z delnjeje połojcy tabulki. Tuž bě dwójne dobyće poprawom móžne.

ST Marijina hwězda –

SJ Budyšin sewjer 0:2 (23:25, 14:25)

Domjacy podachu so po dobyću prěnjeje hry přećiwo mužam ze Šumbacha połni elana na hrajnišćo. Pola Pančanskich hrajerjow pak falowaše wot spočatka sem prawy zapal. Tež hdyž pokazachu někotre rjane akcije při saku, njezamóchu prawe akcenty sadźeć. A přiwšěm pokaza so zaso lapidarnosć při nadaćach. Škoda, dokelž njebuchu ćežko wuwojowane dypki tak z móžnej seriju myto­wane. Tak zawosta serbska šestka stajnje dwaj abo wjac ličakaj za domjacymi. Budy­scy hrajerjo běchu tu klewerniši. Spó­znajo, zo skakaja młodźi hrajerjo z Pančic při blokowanju pře wysoko, koncentrowachu so woni na nabiće bloka. A to wuběrnje fungowaše. Hrajerjo Marijineje hwězdy njezamóchu na to prawje reagować. Tuž wosta při snadnym předskoku a tak dobyću sadźby za Budyske mustwo.