Po znatej přestawce bě so sobotu popołdnju w Ralbičan ćěłozwučowarni znowa wolejbulowy turněr delanskich wjesnych wohnjowych woborow přewjedł. Přeprosył bě wjesnjanosta gmejny Ralbicy-Róžant Hubert Ryćer (njestronjan), na městnje bě zastupjer wjesnjanosty René Wjacławk (njestronjan). Zarjadowar lětsa běše wohnjowa wobora Konjecy-Šunow.

Poprawom ličeše organizator Philipp Młynk z pjeć mustwami, tola na kóncu bě jich šěsć. W srjedźišću turněra steješe jasnje zhromadne wjeselo a zabawa na wólnočasnym niwowje. Ale wězo nochce tež nichtó přěhrać. Hry běchu hustodosć wurunane. Hraješe so kóždy přećiwo kóždemu, a to stajnje dwě sadźbje po wosom mjeńšinach. Faworit běše serijowy dobyćer ze Smjerdźaceje. Lětsa pak běchu tež Róžeńčenjo jara sylni. Tak wuda hrajny plan, zo wobě mustwje w poslednjej hrě turněra přećiwo sebi nastupištej. Róžant kaž tež Smjerdźaca měještej samsnu ličbu dypkow. Po dwěmaj sadźbomaj steješe tež njerozsudnje a tak rozsudźi tiebreak. Tam mějachu Smjerdźečenjo lěpše čuwy a kondiciju a jón jasnje za sebje rozsudźichu.