ST Marijina hwězda –

ST Lubuš 6:1 (2:1)

zestawa domjacych: D. Matik – T. Jurš, R. Cyž, K. Pakoßnick (72. J. Clausen), E. Bulank - Fr. Bulank (76. D. Leppers), J. P. Kuring, Ch. Cyž, M. Wróbl (58. Luk. Hoge) - J. Pakoßnick (68. F. Nagmatov), A. Eldor

Jenož štyrceći přihladowarjow bě sej na sportnišćo w Pančicach-Kukowje dojěło. Wjetšina z nich pak njeje wopyt docyła wobžarowała. Klóšterscy koparjo na tutym dnju mjenujcy nimale kóždu šansu na wrota wužichu.

Wrotowy festiwal startował bě Franc Bulank. Po dwójnej přihrawce mjez Maćijom Wróblom a Christofom Cyžom druhi mjenowany bul preciznje k młodemu Wotrowčanej třěli. Bulank na to wrotarja Josepha Schuppana přewiny (24.). Nažel pak jenož štyri mjeńšiny dołho nawjedowachu, dokelž so po róžku žadyn hrajer hosćićela za Dustina Waltera zamołwity nječuješe. Z něhdźe pjeć metrow wón bul do zdaleneho róžka zhłójčkowa. Ali Eldor pak měješe na to w 38. mjeńšinje prawu wotmołwu. Po tym zo běše Franc Bulank duel w powětře za sebje rozsudźił a z tym Jakoba Pakoßnicka posłužił, so Pakoßnik hač k zakładnej liniji přesadźi. Ali Eldor suny přihrawku na to jenož hišće za wrotowu liniju.