SJ Chrósćicy
– LSV Nowe Město nad Sprjewju 0:0
Zestawa domjacych: Králíček – Teichmann, Cyž, Sentivan, Šafář, Žur (84. Gries), Schulze, Dórnik (70. Bětnar), Runt (65. Młynk), Henčl, Věchet
Při typiskim haperlejskim wjedrje wočakowaše prěnje koparske mustwo Sportoweje jednoty Chrósćicy njedźelu tabulkoweho susoda z Noweho Města nad Sprjewju. Nalětnje słónco, dešć, sylny wětr a krupy njeskićachu pak žane dobre wuměnjenja za šwarnu kopańcu. W cyłym prěnim połčasu hosćo lěpje nadběhowachu. Před wrotami pak wostachu přiwšěm njestrašni. Chróšćanam pobrachowachu cyle jednorje organizacija w defensiwnym dźěle, měr kaž tež ideje při natwarje a trěbna agresiwnosć a wola w dwubojach. Přeco zaso kombinowachu so Nowoměšćenjo z dwójnymi přihrawkami před šěsnatku. Na zbožo njezamóchu nadběhi konsekwentnje zakónčić. Krótko do połčasa pak dóstachu jědnatku, štož wuwabi prašace so mjezwoča a reklamaciju mjez domjacymi. Tež fanam běše hwizdanje njejasne. Kaž pak zawinowar Petr Šafář po hrě přizna, njebě rozsud tola tak wopačny. Domjacy wrotar Petr Králíček třělwu wotwobara.