Tež delanscy Sokoljo su lětsa zaso swoju sportowu wuměnu z wukrajnymi sportowčemi a sportowcami přewjedli. Bě to mjeztym 52. serbsko-čěska wuměna mjez Sokołom Ralbicy/Hórki a TJ Sokolom Spálené Poříčí.
Nimale połsta hosći móžachu w Ralbicach witać. Čěscy a serbscy sportowcy wobhladachu sej nazajtra zhromadnje Budyšin, hdźež mějachu hosćo wodźenje w čěskej rěči, štož so jara lubješe.
Obligatoriska kopańca wězo tež zaso bě, a to na wulkim polu, byrnjež hosćićelske mustwo ćeže ze zestawu měło. Samo Enrico Krawc (něhdyši hrajer Sokoła Ralbicy/Hórki a Budissy Budyšin) z Eisenberga dyrbješe kopački šnórować, zo by dźesać Ralbičanow přećiwo jědnaće koparjam ze Spáleneho Poříčí nastupić móhło. Prěnje a druhe mustwo Sokoła dyrbještej mjenujcy hišće winowatostnej hrě přewjesć. Hosćo, kotřiž běchu wo klasu lěpši, partiju z 1:0 dobychu.
Wosebje rjenje lětsa bě, zo móžachu so słowjanscy susodźa prěni raz na folklornym festiwalu w Chrósćicach wobdźělić. Tam zetkachu tež zastupjerjow čěskeje narodneje mjeńšiny z Chorwatskeje.