Najebać poražku FC Energije do zazběha sezony optimistiscy

Donnerstag, 13. August 2020
Artikel bewerten
(0 Stimmen)
Wulkotnje, kak je Axel Borgmann na lěwym křidle defensiwnje a ofensiwnje hrał.  Foto: Georg Zielonkowski Wulkotnje, kak je Axel Borgmann na lěwym křidle defensiwnje a ofensiwnje hrał. Foto: Georg Zielonkowski

FC Energija Choćebuz

– 1. FC Union Berlin 1:3 (0:1)

Zestawa domjacych: Stawecki (46. Stahl) – Fl. Brügmann (90. Kujović), Koch, Storb (90. Jarosch), Borgmann, Pelivan (90. F. Geisler), Erlbeck (73. Hoppe), Gladrow (64. Postelt), Kremer (73. N. Geisler), Hasse (64. Mäder), Fe. Brügmann (79. Stettin)

Na posledni test do zazběha regio­nalneje ligi 2020/2021 je sej FC Energija Choćebuz zwjazkoweho ligista 1. FC Union Berlin do Stadiona přećelstwa přepro­syła. Wězo je tři klasy wyše hra­jace mustwo ze stolicy hru postajało. Domja­­cy pak so z wulkim zasadźenjom a wolu wobarachu. K wrotam za nich drje dosahaše hakle w kónčnej fazy, zasłu­žene pak 1:3 Marcela Hoppy (87.) na kóždy pad bě. Tež hewak je regionalny ligist cyle hinak wustupował hač tydźeń do toho. A tak móže z někotrymi porjadnymi wočakowanjemi do noweje hraj­neje doby sobotu 13.30 hodź. doma přećiwo Lichtenbergej 47 startować, potom pak zawěsće před wjetšej kulisu.

Na testowu hru přećiwo Unionej bě je­nož­ 523 přihladowarjow přišło, a to při do­wolenych 850. Zawěsće zaležeše to na temperaturach daloko nad 30 stopnjemi, ale tež na šulskim zachodźe we wjele swójbach. Na kóncu wšak dyrbja zamołwići FC Energije Choćebuz tež wo tym­ rozmyslować, hač je zastupny pjenjez 25 eurow za test přećiwo zwjazkowemu ligistej woprawnjeny. Wrota za ho­sći třělichu Neven Subotić (26.), Berkan Taz (52.) a Marius Bülter (77.).

Georg Zielonkowski

Rozmołwa ze sportowym direktorom FC Energije

Po hrě přećiwo 1. FC Unionej Berlin je so­ reporter Georg Zielonkowski ze spor­towym direktorom FC Energije Choćebuz Sebastianom Königom rozmołwjał.

523 přihladowarjow je spokojom domoj šło, sće jako sportowy direktor wolóženy?

S. König: Tež ja sym jara spo­ko­jom, dokelž su to hólcy jara derje činili a zmu­žiće a sebjewědomje přećiwo zwjazko­wemu ligistej wustupowali. Struk­tura w hrě bě spóznajomna, to wšo spož­ča nam wulku nadźiju. Přiwšěm pak bě to dźensa jenož testowa hra.

Hladajo na přihotowansku partiju tydźeń prjedy přećiwo cyłkej z čěskeho Varns­dorfa, jako bě kompletne mustwo chětro wučerpane, pokazachu dźensa wšitcy prima wukon, tež nowopřichady.

S. König: Haj, to trjechi. Wosebje po dźensnišej hrě měnju, zo maja mužojo, kotrychž smy angažowali, kwalitu. Woni budu nam pomhać móc.

Je mustwo nětko kompletne abo hladaće hišće za dalšim zesylnjenjom?

S. König: Mustwo je po zdaću hižo dospoł­ne, štož smy dźensa cyle derje widźe­li. Mamy pak 38 hrow před sobu, tohodla budźemy zawěsće hišće reagować dyrbjeć. Chcemy bórze noweho hrajerja předstajić.

Rěka wón Maciejewski, kiž je dźensa pola Uniona 90 mjeńšin kompletnje na hraj­ni­šću stał? Pječa na njeho hižo dlěje hladaće.

S. König: Woboje trjechi. Tim Macie­jewski je młody kopar, kotrehož chcemy rady w našich rjadach měć. Rozsudźić pak dyrbi 1. FC Union Berlin. Snano mó­že­my so dojednać.

Nowa sezona steji před durjemi, tež konkurenca je so zesylniła.

S. König: Smy sej předewzali stajnje daloko horjeka w tabulce stać. Přiwšěm sej myslu, zo maja druhe mustwa rólu fawo­rita. Tež my pak mamy dobry team, kaž bě dźensa widźeć. Chcemy porjadnje hrać a nic na přećiwnikow hladać. Runje tu doma w Choćebuzu chcemy zaso­ jako mócny cyłk wustupować. A z tym­ chcemy sobotu přećiwo Lichtenbergej 47 hnydom raz započeć.

Wutrobny dźak za rozmołwu, dobry start do sezony a wjele wuspěcha!

Veröffentlicht in Sport

Galerie

Sportowy direktor FC Energije Choćebuz Sebastian König Foto: Georg Zielonkowski
Bitte anmelden, um einen Kommentar zu posten

Anzeige