Bychmy-li tele hłowne nadpismo w meji na sportowych stronach Serbskich Nowin čitać móhli, by to wulke překwapjenje a wjeselo wolejbulistam Viktorije Worklecy było. Woni mějachu dźě jenož jedyn wažny zaměr w tutej sezonje, a to klasu dźeržeć! Započatk hrajneje doby 2020/2021 je so tež jara derje radźił. Tři dobyća a tři snadne poražki wunjesechu Worklečanam w oktobrje respektabelne 5. městno w tabulce sakskeje klasy. Na to pak zadźěwaštej korona a z njej zwjazany lockdown dalšim winowatostnym dypkowym hram.
Wot toho časa wšitcy přiwisnicy wolejbuloweho sporta na nowozapočatk treninga a hrow čakaja. Tydźenja pak rozšěri so powěsć, zo je so prezidij wolejbuloweho zwjazka Sakskeje rozsudźił sezonu cofnyć: žane hry, žane mišterstwo kaž tež žadyn postup a žadyn zestup. Nazymu započnje so nowa sezona ze samsnymi mustwami a samsnymi zestawami staflow.
