Kati Strukowej, nowej zamołwitej za serbske naležnosće wokrjesa Zhorjelc, smědźa so zamołwići wobeju zarjadowarjow, mjenujcy Serbskeho šulskeho towarstwa z.t. a Serbskeho Sokoła z.t., dźakować, zo mějachu wšitcy wobdźělnicy 2. serbskeho sportoweho wubědźowanja „Sportej zdar!“ tež lětsa zaso swójske pisane T-shirty z mjenami šulow na chribjeće. Tak nasta tydźenja wot wšeho spočatka pisane sportowe wubědźowanje serbskich wyšich šulow a Serbskeho gymnazija a nimo toho jara dobre přirjadowanje kubłanišćow do jednotliwych wubědźowanskich lisćinow.

Nowostka, přirunujo lětuše druhe wurisanje z lońšim premjernym, bě połny wuspěch. Šulerki a šulerjo zlěpichu sej nalěpk z płata na swójsku hrudź, na kotrymž bě logo sportoweho swjedźenja a předmjeno sportowče abo sportowca abo swójbne mjeno sportoweje wučerki a sportoweho wučerja napisane. Nalěpki běchu wuhotowarjo Wyšeje šule Slepo připrawili. Tak móžachu so holcy a hólcy mjez sobu z předmjenom narěčeć abo pozdźišo dalši kontakt přez socialne syće nawjazać.