We wrotach Łužiskich liškow steji přichodnu sezonu 25lětny rodźeny Kanadźan Anthony Morrone. 187 cm wulki a 86 kg ćežki nowopřichad změni wot Shefield Steelers z jendźelskeje EIHL do Běłeje Wody.

Jeho kompletne lodohokejowe wukubłanje absolwowaše „goalie“ w Kanadźe. Tak steješe hač do lěta 2020 za mustwa w kanadiskich juniorskich ligach mjez žerdźomaj. Po tym zwaži sej kročel do Europy a zakitowaše wrota stajnje jednu sezonu dołho za EHC Lustenau w Awstriskej, Mulhouse w najwyšej francoskej lodohokejowej lize kaž tež za HK Olimpiju Ljubljanu w Słowjenskej. W zašłej sezonje swjećeše ze Sheffield Steelers mišterstwo w najwyšej jendźelskej lize.

Transfer Anthonyja bě trěbny, dokelž je wrotar Matthew Galajda próstwu wo rozpušćenje zrěčenja z Łužiskimi liškami stajił. Jeho přeće za wosobinskej a powołanskej nowoorientaciju su zamołwići kluba po intensiwnych rozmołwach a jednanjach spjelnili.