Kołowokoło Radworskeje sportownje „Slavia“ steješe minjenu njedźelu hižo rano po wosmich mnoho awtow. Sakske towarstwo za mjetańcu z. t. bě 48 młodych sportowčow na wubědźowanje přeprosyło, w běhu kotrehož chcychu dwaceći holcow lětnika 2013 za saksku dorostowu wubranku w mjetańcy namakać.

Mustwa z Lipska a Drježdźan, z juhozapada kaž tež wuchoda Sakskeje běchu sej do Radworja dojěli. Z „Witajće k nam“ jich Radworska wjesnjanostka Madelaine Rynčowa na spočatku zarjadowanja postrowi. Kerstin Herzer, wiceprezidentka za dorost w Sakskim zwjazku mjetańcy z. t. na to nawjaza prajo, zo wotměwa so wurisanje w dwurěčnej kónčinje našeho kraja. Jakob Dietrich, krajny trenar za mjetańcu w Sakskej, so zamołwitym dźakowaše, zo běchu Radwor jako městnosć wubědźowanja wuzwolili. Wšitcy běchu sej přezjedni, zo ma tamniša gmejna ze swojej sportownju woprawdźitu parličku, kotraž zarjadowanja na tajkim niwowje zmóžnja.