Kopar SJ Njebjelčicy Ionel Statnik je sobotu za Njebjelčanow we Łutach hižo w prěnjej mjeńšinje wrota trjechił a cyłk SJN spěšnje na dobyćerski puć wjedł. Hišće do połčasa trjechištaj tež Handrij Korjeńk a Wiliam Plaettner. Hrajny staw 3:0 po połčasu bě zdobom kónčny wuslědk. W tabulce wokrjesneje ligi stafla dwaj sunychu so Njebjelčenjo na štwórte městno. Pančanscy koparjo přěhrachu w Běłym Chołmcu 2:5 (0:1). Wrota za hosći docpěštaj Christoph Cyž a Jakob Pakoßnick. SJ Chrósćicy II – HZ Wulke Zdźary/Kulow II hrajachu 0:2 (0:0) a ST Kinspork/Łužnica – ST 1922 Radwor 4:1 (2:0). Hosćo z Radworja chcychu w pjatej hrě skónčnje zaso połnje dypkować. Hižo w prěnjej mjeńšinje pak hosćićeljo nawjedowachu. Čestne wrota docpě Claudius Buša. Z jednym dypkom steji Radworske mustwo na poslednim městnje w tabulce.