Póst Germania Budyšin –

Sokoł Ralbicy/Hórki 2:1 (1:1)

zestawa hosći: Schöne – B. Heidorn, Mjechela, Wałda, Šewc, Hicka, N. Šnajder, R. Šnajder (71. Čóška), Woko, Bulank, L. Heidorn

Na poslednju hru w Budyšinje so Sokoljo rady dopominaja, jako w połfinalu wo-krjesneho pokala domjace mustwo přewinychu a finale doma docpěchu. Předznamjenja pak njeběchu tutón raz tak dobre. Dla wšelakorych přičin njestejachu wšitcy hrajerjo k dispoziciji a start do hry so tež nimokuli.

Flanku Antona Stehra zaměstni Bruno Brückner hižo w pjatej mjeńšinje z hłowu we wrotach. To pak běše prawy signal a Sokoljo nětko lěpje wustupowachu. Po wjacorych stacijach so Ralbičenjo přez srjedźne polo doprědka kombinowachu. A tak zhłójčkowa Richard Šnajder flanku Adriana Woka na wurunanje w 11. min. do dołheho kuta wrotow. Sokoljo spytachu sej z wěsteje defensiwy přeco zaso strašne kontery wuhrać, tola poslednja preciznosć jim stajnje pobrachowaše. Tuž njeje ničo ličomneho za nich wuskočiło. Dokelž sebi Budyšenjo tež žane dobre šansy njewuhrachu, podaštej so wobě mustwje ze sprawnym remisom do kabiny.