Choćebuz (SN/mb). Dalši znaty Serb kandiduje w Delnjej Łužicy za AfD: Skótny lěkar Ulrich Wünsch nastupi na lisćinje AfD za wólby měšćanskeje rady Choćebuza we wólbnym wokrjesu Dešank, Depsk, Žylowk, Zaspy, Chmjelow, Žylow, Škódow a Rogozno. To rozprawja „Nowy Casnik“ (NC) w aktualnym wudaću. Do toho je kandidatura Hanza Wylema-Keła, prominentneho zapósłanca Serbskeho sejma a předsydy „Łužiskeje aliancy“, za AfD we Wětošowje zadźiwanje w serbskej zjawnosći zbudźiła (Serbske Nowiny su rozprawjeli). Tež Wünsch běžnje delnjoserbsce rěči, tohodla su jeho njedawno wobdźělnicy projekta „Zorja“ w zwěrjencu wopytali – a to běše tež tema přinoška telewizijneho wusyłanja „Łužyca“.
Mjeztym so předsydstwo župy „Delnja Łužica“ wot wólbneho wabjenja Choćebuskeje AfD ze serbskimi drastami distancuje. Na naprašowanje NC předsyda AfD w Choćebuzu kritiku wotpokaza, wšako serbska drasta „njeje uniforma Domowiny“, ale dźěl „našeje kultury, našeje tradicije, našeje domizny“. Wo serbskej rěči pak w programje Choćebuskeje AfD ničo njenamakaš.
Washington (dpa/SN). Prezident USA Joe Biden je zasudźenje bywšeho prezidenta Donalda Trumpa k wólbnej namołwje w swójskej naležnosći wužił. „Je jenož jeničkeje móžnosće, Donaldej Trumpej puć do Běłeho domu zatwarić, we wólbnej kabinje“, piše demokrat na swojej internetnej stronje. Proces je pokazał, zo njesteji nichtó nad zakonjom, Biden rjekny. Trump wohrožuje demokratiju a „přinjese jenož chaos“, prezident twjerdźi.
Žana woborna winowatosć
Erfurt (dpa/SN). Zwjazkowe knježerstwo njeplanuje po słowach zwjazkoweho kanclera Olafa Scholza (SPD) žadyn nawrót k wobornej winowatosći w znatej formje. Tole njeje tež zakitowanski minister Boris Pistorius (SPD) nihdy předwidźał. Informacije, zo běchu wotpowědne plany hižo hotowe, Scholz wotpokazuje. Dźensa je tójšto modelow zakitowanja kraja. Pistorius ma nadawk, najlěpši wuzwolić a předstajić, Scholz rjekny.
Zajim za europske wólby přiběra
Washington (dpa/SN). Zwjazkowe knježerstwo je Ukrainje dowoliło, wot Němskeje dodawane brónje přećiwo wojerskim objektam na ruskim teritoriju zasadźić. Ruska je Ukrainu minjeny čas wosebje w Charkiwskej kónčinje wot zepěranišćow w bjezposrědnym pomjeznej ruskim teritoriju nadběhowała, zdźěli rěčnik knježerstwa Steffen Hebestreit. Z tym přizamknje su Berlin znowa knježerstwje USA. Te bě Ukrainje wčera wječor dowoliło, brónje USA we wobmjezowanym wobjimje přećiwo wojerskim objektam w Ruskej zasadźić. Ukrainske wójsko dyrbjało kmane być, „ruske wójsko nadběhować“, we Washingtonje rěkaše. Němski zakitowanski minister Boris Pistorius (SPD) je Ukrainje mjeztym nowy paket brónjow w hódnoće 500 milionow eurow přilubił.
Hač směła Ukraina wšě wot zapada přewostajene brónje za nadpady na wojerske objekty w Ruskej wužiwać, w NATO dale kontrowersnje diskutuja.
Samo sudnik bě bjezradny: W USA je so muž k sudniskemu jednanju jězdźenja bjez jězbneje dowolnosće dla internetnje přizamknył – sedźo za wodźidłom awta. Sudnik Cedric Simpson w staće Michiganje nochcyše swojimaj wočomaj wěrić. Wobskorženy bě po puću k lěkarjej, kaž rjekny a pytaše runje za parkowanišćom. Rozhorjeny sudnik mužej kazaše, so hišće samsny dźeń w jastwje přizjewić. Po dwěmaj dnjomaj jeho zaso pušćichu. Přichodny sudniski termin je srjedu.
Na drjewjanym mosće so přełamał je kóń we wokrjesu Trier-Saarburg. Jěcharka chcyše wčera rano konja pěši po mosće wjesć, jako so zwěrjo ze zadnimaj nohomaj přełama a so snadnje zrani. Kóń njemóžeše wjace sam stanyć. Alarmowane wohnjowe wobory wjacorych wsow přijědźechu a konja skónčnje wuswobodźichu. 54lětna jěcharka so njezrani.