Přećiwnik twjerdy kaž granit
Prěnja hra w lěće 2017 wjedźeše prěnje volleyballowe mustwo žonow ST Marijineje hwězdy do Budyšina. W ćěłozwučowarni Serbskeho šulskeho a zetkawanskeho centruma so Kobličanki a jich trenar Pětr Blümel doma čuja. A to Marijine hwězdźički wot wšeho spočatka tež pytnychu.
JTVG Fitnes Koblicy
– ST Marijina hwězda 3:1
(26:24, 25:15, 21:25, 25:11)
Wendt zesylnja Módro-běłych Kulow
Třicećilětny kopar Tommy Wendt z Nadrózneje Hrabowki je nowe wužadanje pytał a namaka je w Kulowje. A hodźeše so derje do koncepta Kulowskeho trenarja Waldemara Adamowicza. Nazwučowarjej Módro-běłych Kulow w teamje přechodnje wažnaj hrajerjej pobrachujetaj. Tino Schapals dźe poł lěta do Awstralskeje, a Martin Sauer dyrbi so na bjedrje operować dać a dlěši čas wupadnje. Adamowicz, kiž ma hižo dwě lěće z Tommyjom Wendtom kontakt, je wjesoły, zo je so za Módro-běłych rozsudźił. Wustojny nadběhowar je so hižo z mustwom zeznajomił, na halowym koparskim turněrje Rakečanskich koparjow w Radworju hrał a wurisanje sobu dobył. Nowopřichad rjekny: „Wjeselu so, zo je mje mustwo tak derje přiwzało. Čuju so w nim jara derje.“
Widźał,słyšał, napisał (23.01.17)
Awtor dźensa
André Strelow
Ničo noweho w zwjazkowej lize? Nic cyle, koparjo FC Bayern Mnichowa su so z kónctydźenskim dobyćom přećiwo Freiburgej doskónčnje z nazymskim mištrom stali. Hrajersce njebě to runjewon přeswědčiwy wukon, na kóncu pak liča jenož docpěte wrota. Lewandowski třěli w poslednich sekundach hry 2:1 a zawěsći tak dobyće. Štóž so boješe, zo budźe prěni přesćěhar, Lipšćanski RB, po hodźoch bjez wuspěcha, so myleše. Z jasnym dobyćom přećiwo Eintracht Frankfurtej podšmórny tón swoje wurjadne druhe městno. Zdobom skónči mału negatiwnu seriju. Poslednjej hrě lěta 2016 bě mjenujcy přěhrał. Chcu znowa podšmórnyć, runje hladajo na postup čerwjenych bykow, zo je tučasny wuspěch wosebje za wuchodnu kopańcu jara wažny. Towarstwo je přikład dalšim „wuchodnym“.
Halowe turněry
Na zbytk hrow derje přihotowani
Z absolutnje wobhladanjahódnej kopańcu su hrajerjo FC Energije Choćebuz swojich wopytowarjow sobotu w Stadionje přećelstwa zapleńčili.
Energija pokaza hrajnu sylnosć, kombinowaše wulkotnje a pokaza pressing, kotryž zawostaji we wyšoklasowym mustwje porjadny zaćišć. Prěnje wrota nastachu po kombinaciji mjez Fabijom Viterittijom a Joshuwu Putze. Třělił pak je wrota w 22. min. Tom Nattermann, stejacy sam w centrumje. Wón bě krótko do toho za zranjeneho Benjamina Förstera do hry přišoł. W kónčnej fazy partije bu Streli Mamba w šěsnatce foulowany a Viteritti přetwori jědnatku ke kónčnemu 2:0. Štwórtk wočakuje FCE konkurenta z regionalneje ligi, FC Hornju Łužicu Neugersdorf. To budźe zdobom posledni test do starta druheje połserije, kotryž budźe eksaktnje tydźeń po tym pola RB Lipska II. Georg Zielonkowski
W Bedřichovje w sněhakowanju so wukmanili
Šulerjo 8. lětnika Serbskeje wyšeje šule Ralbicy pobychu kaž kóžde lěto w sportowym lěhwje w čěskim Bedřichovje, hdźež so w sněhakowanju na běžkach a alpinskich sněhakach wukmanjeja.
Sport (20.01.17)
Turněr při wysokim saku
Kulowscy wólnočasni volleyballisća TSV Žołto-módrych Kulow zarjaduja póndźelu, 30. januara, w sportowej hali turněr ze šěsć prošenymi cyłkami. Přihladowarjo pak su lubje witani. Hry započnu so w 19.15 hodź.
Pawk přeproša na kopańcu
Serbske młodźinske towarstwo Pawk přeproša zajimowane mustwa na halowy koparski turněr, kotryž budźe sobotu, 4. februara, w Radworskej sportowej hali. Startowy pjenjez na mustwo wučinja 15 eurow, maksimalnje dźesać cyłkow smě so wobdźělić, dwě městnje hišće stej. Hrate budźe z jednym wrotarjom a štyrjomi pólnymi koparjemi. Hry nawjedować budu Lea Krječmarjec, Anna Richterec a Lukaš Kolca. Zakop budźe w 17 hodź.
W hali za bulom honić
Biskopičanske koparske towarstwo přewjedźe w zymskej přestawce wjacore halowe koparske turněry. Wone budu wot 17. do 19. februara a wot 24. do 26. februara w Biskopičanskej sportowej hali Wesenitz. Mustwa smědźa so hišće přizjewić, startowy pjenjez wučinja 30 eurow. Naprašowanja prošu Tinej Gottlöberei pod: abo pod tel. čo. 0152/27939516.
17.02. 18:00 młodźina A
18.02. 9:00 młodźina C
18.02. 15:00 młodźina B
19.02. 14:30 žónske cyłki
Hrajne terminy FCE postajene
Wulke přesłapjenje su fanojo FC Energije (FCE) Choćebuz minjene dny předźěłać dyrbjeli. Po tym zo bě hruby hrajny plan za regionalnu ligu kruty, je Sewjeroněmski koparski zwjazk (NOFV) eksaktne hrajne terminy postajił.
A z terminow NOFV nětko wučitaš, zo hraje FCE na 19. hrajnym dnju štwórtk, 2. februara, w 13.30 hodź. w Lipsku přećiwo RB Lipsk II. Chětro wulki bě wukřik mjez fanami Energije, kotřiž běchu hižo w prěnjej połseriji při wažnej wonkownej hrě přećiwo Carl Zeiss Jenje „wuzamknjeni“. Tež tule partiju běchu štwórtk přewjedli. Bjez dźiwa, zo so Choćebuski přiwisk hórši: „Najwjetši dźěl chodźi na dźěło. Ći, kiž w změnach dźěłaja, bjeru sej přeco dźeń dowola za wonkowne hry, ale to w NOFV po zdaću nikoho njezajimuje. Do Lipska by zawěsće 1 000 ludźi jěło, nětko pak dyrbi so naše mustwo ze 100 rentnarjemi spokojić“, rěka zhromadne měnjenje w fanowej scenje. NOFV pak wopodstatni postajenje z wobmyslenjemi wokoło wěstoty. We a wokoło Lipska je prěni februarski kónc tydźenja chětro wjele zarjadowanjow. Policija njemóže tuž mjenowanu koparsku hru pjatk abo sobotu zawěsćić.
Budissa ma nowe předsydstwo
Přihoty derje zaběželi
Z Reimundom Linkertom, trenarjom regionalneho koparskeho ligista Budissa Budyšin, je so Hanspeter Benad rozmołwjał.
Knježe Linkerto, sće z přihotami na 2. połseriju sezony spokojom?
R. Linkert: Mějachmy chětro dobre treningowe lěhwo nad Baltiskim morjom a smy tam jubilejny 25. halowy cup dobyli. Přihoty su tuž dosć derje zaběželi.
Štó budźe na poziciji Christopha Klippela hrać, kiž bu suspendowany?
R. Linkert: Mamy wjacore opcije. Po přihotowanskej fazy a testowych hrach doskónčnje rozsudźimy.
Změje Budissa Budyšin w hrajnej dobje 2017/2018 zaso druhe mustwo?
R. Linkert: Na to tuchwilu wotmołwić njemóžu.
Z 19lětnym Markom Žuljevićom sće wot FC Hornjeje Łužicy Neugersdorf koparja angažowali, kiž bu tam lědma zasadźeny. Njeje to zwažliwe?
R. Linkert: Žuljević wrotowe akcije jara kwalitatiwnje wotzamkuje a budźe našemu mustwu dale pomhać.
Přidruža so wam w zymskej přestawce hišće dalši nowi hrajerjo?
R. Linkert: Rozhladujemy so za dalšimi koparjemi.
Nadźijeće so, zo steji Budissa na kóncu sezony nad zestupnej smužki?
