Ministerstwo model 2plus za rjadownju 1. lětnika w Radworju šmórnyło

Drježdźany (SN/mb). Zo jej „jako wučerka ćežko padnje, sedźo rěčeć“ njeje tomu zadźěwało, zo Diana Šołćina zastupjerjow frakcijow a knježerstwa na prěnim zjawnym posedźenju serbskeje rady tuteje wólbneje periody wčera w sakskim krajnym sejmje wutrobnje witaše. Najprjedy so předsydźe rady zašłych pjeć lět, Markej Suchemu, dźakowaše, kiž je z połnej paru gremij nawjedował. Stefan Anders, předsyda zarjadniskeho zwjazka „Při Klóšterskej wodźe“ a jako zastupjer komunow nowy čłon rady, informowaše wo prěnich třoch wuradźowanjach gremija po nowowólbach.