Po wuspěšnym jubilejnym kóncu tydźenja nawróći so w Smjerdźacej wubědźowanska nalada. Při hašenskim nadběhu zašłu njedźelu wubědźowachu so wobornicy wo dwaj pokalej.

Najprjedy wojowachu wo trofeju zarjadniskeho zwjazka „Při Klóšterskej wodźe“.

Do poslednjeho běha běchu sej jednotliwe wobory hladajo na dypki jara blisko: Wobornicy z Róžant-Sernjan ležachu ze 100 dypkami snadnje před Smjerdźacej z 99 ličakami. Falowaceje načolneje jednotki dla bě napjatosć hižo do wubědźowanja skerje snadna. Prawe mocyměrjenje wo trofeju přiwšěm knježeše. Smjerdźečenjo dobychu na kóncu před Wotrowčanami a wobornikami z Konjec-Šunowa.

Helmut Libš, něhdyši zamołwity wobornik wokrjesa, bě w regionje před wjacorymi lětami za wubědźowanje rozsudne impulsy dał. Uta Katzerowa ze Smjerdźaceje wuzběhny wuznam jeho angažementa: „Helmut je wubědźowanje tule do kónčiny přinjesł a natwarił. Bjez njeho njeby tute wubědźowanje wohnjoweje wobory ženje tak daloko přišło. Z pokalom zarjadniskeho zwjazka ‚Při Klóšterskej wodźe‘ chcyše, zo wubědźowanje dale wobsteji.“