Lwiw (dpa/SN). Při raketowym nadpadźe na bydlensku štwórć zapadoukrainskeho města Lwiw su po informacijach nutřkowneho ministerstwa minjenu nóc štyrjo wobydlerjo žiwjenje přisadźili. Znajmjeńša 32 ludźi je so zraniło. Pomocnicy dale za woporami pytaja, dokelž na to ­tukaja, zo mnozy hišće pod rozwalinami leža. Ukrainski prezident Wolodymyr ­Zelenskyj připowědźa „definitiwnu a čujomnu wotmołwu njepřećelej“. Wobrazy z Lwiwa pokazuja zničene domy cyłeje dróhi jako „sćěh nócnych nadpadow ruskich teroristow“, Zelenskyj w swojim stejišću piše.

W Lwiwje je wjele ćěkancow z wójnskich kónčin Ukrainy. Hač do junija bě w měsće na zapadźe kraja poměrnje měrne wostało. Potom pak bu město dale a bóle cil ruskich nalětow. Po informacijach měšćanosty je Lwiw wot spočatka ruskeje inwazije něhdźe 150 000 ludźi z druhich kónčin kraja přiwzał. Město z něhdy 720 000 wobydlerjemi leži jenož 70 kilometrow wuchodnje mjezy Pólskeje a je wažny industrijny a zarjadniski centrum.

Opozicija CDU a CSU ma wusud za wulku plistu amplowej koaliciji

Karlsruhe (dpa/SN). Zwjazkowe wustawowe sudnistwo je za jutře planowane schwalenje wjele diskutowaneho tepjenskeho zakonja w zwjazkowym sejmje w spěšnym sudniskim jednanju zadźeržało. Druhe a třeće wobjednawanje njesmě so w tutym tydźenju přewjesć, najwyše němske sudnistwo wčera zdźěli. Zastupnicy CDU a CSU reagowachu wulce spokojeni a mjenowachu wusud „plistu amplowej koaliciji SPD, Zelenych a FDP“. Politikarjo FDP wobwinowachu w prěnjej reakciji Zelenych.

Rozsud zwjazkoweho wustawoweho sudnistwa, wjele diskutowany tepjenski zakoń amploweje koalicije zadźeržeć, je na prěni napohlad ćežka poražka knježerstwa SPD, Zelenych a FDP. Planowany ­galop zakonja přez parlament je najprjedy raz z blida. Hladamy pak na debaty a bjezkónčne wuradźowanja minjeneho časa zakonja dla, zwěsćamy, zo njeje nihdy wo to šło, hač zakoń w Němskej wukazaja, ale jenož wo to, kak měł so wón zwoprawdźić. Płaći zakoń hižo wot 2024 abo hakle pozdźišo? Su 80lětni wuwzaći abo tola nic? Stajnje dźěše wo skerje pódlanske prašenja a ženje wo zasadny problem, hač je zatwar milionow ćopłotnych klumpow woprawdźite wumóženje Němskeje a swětoweje klimy scyła. Opozicija CDU/CSU měła składnosć wužić, tute zasadne prašenja rozrisać a na dobro ludźi zrja­dować. Dyrbjał-li wusud w Karlsruhe tepjenski zakoń jeničce časowje přestorčić, by cyła próca wo změny na kóncu po­darmo była. Marko Wjeńka

Drježdźany (dpa/SN). Běła flota Sakskeje móže Łobjo trajaceje pobrachowaceje wody dla, wot minjenych dnjow jenož ­hišće zdźěla wužiwać. „Wot minjeneho tydźenja su poprawom jenož hišće kołojězby móžne“, rjekny nawtiski nawoda předewzaća Jochen Haubold na naprašowanje nowin. Tak su jězby do Sakskeje Šwicy jenož hišće wot Pirny a mjez Drježdźanami a Mišnom móžne. Niskeje wody dla móža jenož hišće historiske parniki zasadźeć, kotrymž dosaha 50 centimetrow wody při Drježdźanskim pegelu. Modernej salonowej łódźi trjebatej znajmjeńša 60 centimetrow. Wonej stej při Terasowym pobrjoze přiwjazanej.

Přehlad krajneho centruma za škit před wulkej wodu wobswědči wčera dopołdnja 64 centimetrow, normalnej stej dwaj metraj. „Wuhlady njejsu wjele lubjace“, Haubold rjekny. Za połoženje w rěce je rozsudne, što so w hornim dźělu stawa. Łobjo dóstawa wodu k 95 procentam z Čěskeje z někotrymi hodźinami zapozdźenja. Jězbny plan wotpowědujo prognozam ze susodneho kraja stajnje aktualizuja. Nakładne łódźe hižo wot 28. meje wjace njejězdźa, Haubold zdźěli.