Wočakuja napjatu atmosferu
Wjerškowe zetkanje G 20 na kupje Bali z wobdźělenjom Ruskeje
Bali (dpa/SN). Na indoneskej kupje Bali su dźensa zetkanje wonkownych ministrow skupiny G20, wodźacych a wuwiwacych so hospodarskich mocow, zahajili. Němska wonkowna ministerka Annalena Baerbock (Zeleni) zasadźowaše so do wotlěta k zetkanju za zhromadnu reakciju na ruski wojerski nadpad na Ukrainu. „Smy wšitcy na tym zajimowani, zo so mjezynarodne prawo respektuje, to nas wšitkich jednoća. To je přičina, čehodla njesměli Ruskej jewišćo zetkanja přewostajić“, wona rjekny.
Na zetkanju na Bali wočakuja nimo Baerbock a wonkowneho ministra USA Tonyja Blinkena tež ruskeho wonkowneho ministra Sergeja Lawrowa a toho chinskeho kolegu Wanga Yija wosobinsce. Skupinje G20 přisłušeja tež awtoritarnje nawjedowane kraje kaž Ruska, China a Sawdi-Arabska. Ruska ma tuchwilu prezidentstwo skupiny a wustupuje tuž jako hosćićel.
To a tamne (07.07.22)
Ze swojim žiwjenjom zapłaćił je běły kenguru wulět po awtodróze 44 pola Mönchengladbacha. Dokelž njeje so policistam poradźiło, stajnje zaso ćěkace eksotiske zwěrjo popadnyć, dyrbjachu hajnika přiwołać. Tón pak třělbu za pohłušenje njeměješe a so tuž rozsudźi, kenguruwa zatřělić. Kaž so wukopa, bě zwěrjo z priwatneje ležownosće twochnyło.
Po jenož 25 dnjach je ekstremny sportowc Joseph Heß w Rynje płuwajo swój zaměr docpěł a po 1 200 kilometrach Rotterdam nad Sewjernym morjom docpěł, w rekordnym času. Něhdźe dźesać hodźin je hospodarski inženjer z Kamjenicy wšědnje we wodźe był. Dokelž njeběchu jemu dowolili, w Rotterdamje płuwać, dowjezechu jeho w motorowym čołmje po měsće. Poslednjej dwaj kilometraj hač k Sewjernemu morju Heß sam płuwaše, přewodźany wo wodoškitneje policije.
Žadaja sej wotstup Johnsona
London (dpa/SN). Žadanja wotstupa britiskeho premierministra Borisa Johnsona bywaja dźeń a wótřiše. Wjacori zapósłancy jeho konserwatiwneje strony kaž tež konserwatiwne medije kaž nowina „Times“ namołwjachu knježerstwoweho šefa, zastojnstwo spušćić. Prawdźepodobnje chcedźa jeho kritikarjo postajenja strony změnić a znowa wotum njedowěry přewjesć. Wčera staj strowotniski minister Sajid Javid a financny minister Rishi Sunak swoje zastojnstwo złožiłoj. Jako přičinu mjenowaštaj nawjedowanski stil Johnsona.
Wjace dźěłali hač dojednane
Wiesbaden (dpa/SN). Přerěznje 4,5 milionow ludźi w Němskej je loni wjace dźěłało hač w swojim zrěčenju dojednane. Z tym je něhdźe 12 procentow cyłkownje 37,8 milionow dźěłopřijimarjow nadhodźiny wukonjało, zdźěli dźensa Zwjazkowy statistiski zarjad we Wiesbadenje. Mužojo nadźěłachu sej z podźělom 14 procentow trochu časćišo nadhodźiny hač žony z dźesać procentami.
Njepřećel so wróćo sćahnył
Wid wot pólskeje strony na město Frankobrod (Frankfurt) nad Wódru w ...
Wjace lisćowcow w lěsach trěbne
Berlin (dpa/SN). Hladajo na lěsne wohenje w Braniborskej je sej minister za lěsnistwo a klimowy škit zwjazkoweho kraja Axel Vogel (Zeleni) spěšniši přetwar lěsa z jasnje wjace lisćowcami žadał. Přeco hišće je tam něhdźe 80 procentow chójnowych lěsow. „Měli jasnje wjace lisćowych štomow měć, štož je kaznja hodźiny“, wuzběhny Vogel wčera w informaciskim radiju sćelaka RBB.
Něhdźe 600 000 hektarow jehlinoweho lěsa dyrbjeli cyłkownje w zwjazkowym kraju přetwarić. Tajki přetwar wotměwa so wob lěto na něhdźe 5 000 hektarach, štož njedosaha. Přetwar dyrbjeli klimoweje změny dla w běhu jedneje generacije zmištrować. „Hewak snano bórze hižo žane lěsy w Braniborskej nimamy.“ Dohromady je w kraju wjace hač milion hektarow lěsnych přestrjenjow.
Vogel pokaza na tuchwilne štwórte suche lěto minjenych pjeć lět. Dotal su so hižo 755 hektarow lěsa wotpalili. Sezona lěsnych wohenjow pak je so runje hakle započała. Něhdźe 80 procentow wohenjow su ludźi zawinowali. Mjeztym je so přizjewjenski proces polěpšił. Najwjac wohenjow su wohnjowi wobornicy spěšnje našli a tuž njemóžachu so spěšnje wupřestrěć.
Olaf Scholz staji so prašenjam
Berlin (dpa/SN). Krótko do lětnjeje přestawki zwjazkoweho sejma chcyše zwjazkowy kancler Olaf Scholz (SPD) na prašenja zapósłancow wotmołwić. Prjedy hač so naprašowanje po připołdnju zahaji, Scholz skrótka k zapósłancam porěča. Po tym mějachu sobustawojo parlamenta 60 mjeńšinow chwile, swoje prašenja stajeć. Fachowcy wuchadźachu z toho, zo póńdźe mjez druhim wo nadpad Ruskeje na Ukrainu a wuskutki na Němsku. Potajkim měł so kancler tež k inflaciji a płunowej nuzy wuprajić.
Zawěsće ma zwjazkowy kancler tež tak mjenowanu „koncertowanu akciju“ wuswětlić, wo kotrejž je wón z dźěłodawarjemi a dźěłarnistwami rěčał. Dale bě hišće hodźinska debata planowana. W njej měješe tež wo energijowe zastaranje we wójnskich časach hić. Móžny dalši tema bě etat Zwjazka. Aktualnu hodźinu bě frakcija CDU/CSU zapodała.
Je zdawna načasu
Wojuja dale
Móžno zo honač njewotwjertnu
Dortmund (dpa/SN). Braniborski hospodarski minister Jörg Steinbach (SPD) so boji, zo Ruska po přepruwowanju płunoweje pipeliny Nord Stream 1 honač zaso njewotwjertnje. Tole rozłoži wón wčera nowinje Bild a pokaza na lětne hladanje, kotrež dźesać dnjow traje. „Z wobstejnosćow sćěhuju, zo móhli snano argumenty namakać, stop trajnje podlěšić.“
Lětne hladanske dźěła na Nord Stream 1 zahaja so 11. julija a zwjetša dźesać dnjow traja. Potom hižo žadyn płun po pipeline njeběži. Wulka starosć tuž je, zo Ruska po tym płunowy honač zaso njewotwjertnje. Před totalnym wupadom ruskeho płuna je mjez druhim tež zwjazkowy hospodarski minister Robert Habeck (Zeleni) warnował.
„Stop nas k tomu nuzuje, płun z tamnych krajow kupować, štož je drohe. Potom njemóžemy płunowe składy dale pjelnić. Potom dyrbi stat zapřimnyć a schodźenk III wuwołać,“ Steinbach wuswětli. Habeck je hižo alarmowy schodźenk II w zwisku z nuzowym planom płun wuwołał. Nastupajo třeći schodźenk je jedna z naprawow, zo ma stat potrjebu płuna wotpowědnje regulować a ju pomjeńšić.
„Nanuzowane lutowanje“
Drježdźany (dpa/SN). Sakska předsydka Lěwicy Susanne Schaper ma wobmjezowane wužiwanje ćopłeje wody w energijowej krizy za njesprawne. Z kritiku poćahuje so 44lětna na rozsud bydlenskeho drustwa Dippoldiswalde, sylnje stupacych energijowych płaćiznow dla ćopłu wodu hižo wodnjo a w nocy k dispoziciji njestajić. Po słowach Schaper njewotpowěduje to žiwjenskej realiće. Drustwo chce swojich podružnikow hladajo na wysoke pódlanske kóšty škitać, štož je wopačny puć.
„Za ludźi, kotřiž maja małe dźěći abo w změnach dźěłaja, je nanuzowana lutowanska naprawa njepřicpějomna. Wone sahaja do prawow na samopostajowanje a su nastupajo podruž hruby njedostatk“, Schaper wujasni. Rozsudne je, ekstremnje stupace energijowe płaćizny wobmjezować a je dołhodobnje stabilizować, štož maja energijowe koncerny ze swojeho nadbytka financować. Schaper pokaza na minjeny pjatk wotměte kulojte blido Lěwicy na temu „energijowa chudoba“. Nimo toho chce sakska Lěwica energijowe płaćizny na přichodnym posedźenju krajneho sejma přednjesć a diskutować.
