Na wopyće w Ukrainje
Kijew (B/SN). Vatikanski zamołwity za wonkowne naležnosće arcybiskop Paul Gallagher je njedawno Buča, małe to předměsto Kijewa, wopytał. „Dźensniši wopyt bě złe dožiwjenje. Budźe dołho trać tele rany hojić, wodaće namakać a na procesu wujednanja dźěłać“, praji wón powěsćowemu portalej Vatican News. W rozmołwje z komunalnymi politikarjemi w Lwiwje podšmórny wón, zo so Vatikan za teritorialnu integritu Ukrainy zasadźuje. Dale poskići vatikanski diplomat ukrainskemu wonkownemu ministrej Dmytrej Kulebje pomoc Swjateho stoła při jednanjach mjez Ukrainu a Ruskej.
Institut oficialnje wotewrjeny
Kraje EU wuradźuja
Brüssel (dpa/SN). Statni a knježerstwowi šefojo čłonskich krajow EU su so dźensa w Brüsselu na wurjadny wjeršk zešli. Zaměr dwaj dnjej trajacych wuradźowanjow su mjez druhim plany, kak móhli z inwesticijemi wjacorych miliardow eurow spěšnje njewotwisnosć wot ruskich energijowych žórłow docpěć. Nimo toho dźe wo naprawy přećiwo wysokim płaćiznam energije a wo dalšu podpěru na dobro Ukrainy. Tamniši prezident Wolodymyr Zelenskyj chcył so po puću widejoweje konferency wobdźělić.
Lawrow: Ruska chce Donbass
Moskwa (dpa/SN). Ruski wonkowny minister Sergej Lawrow je wobsadźenje wuchodneho ukrainskeho Donbassa „bjezwuměnitu prioritu“ mjenował. Dźe wo to, ukrainske wójsko a bataljony z kónčiny Donjecka a Luhanska wutłóčić, rjekny Lawrow francoskim nowinarjam. Wón rěčeše wo „wuswobodźenju“ Donbassa wot „Kijewskeho režima“. W tamnych kónčinach ruskeje „wojerskeje operacije“ měli ludźo sami wo swojim přichodźe rozsudźić, Lawrow rjekny.
Zahaja koaliciske jednanja
Něhdźe 15 000 ludźi je so wčera wječor na dobroćelskim ...
Jasne wuprajenja hladajo na wuhlo
Berlin (dpa/SN). Wobswětowi a energijowi ministrojo statow G7 su po wuprajenju zwjazkoweje ministerki za wobswět Steffi Lemke (Zeleni) na swojim zetkanju w Berlinje konkretne dojednanja wo zakónčenju wudobywanja wuhla wujednali. „Tak su cyle konkretne dojednanja za wutwar wobnowjomnych energijow, ale tež na přikład k wustupej z wudobywanja wuhla“, politikarka Zelenych w rańšim wusyłanju telewizijneju sćelakow RTL a ntv minjeny pjatk wuswětli. Kónčne wozjewjenje zhromadneho schadźowanja wusměrja so „jara sylnje na škit klimy, biologisku mnohotnosć w přirodźe, ale tež na angažement přećiwo zanjerodźenju nastupajo plastiku.“
Nětko spěšnje brónje wobstarać
Heil za klimowy pjenjez
Minister chcył ludźom ze snadnymi dochodami pomhać – reakcije wšelake
Berlin (dpa/SN). Wobydlerki a wobydlerjo Němskeje z měsačnymi dochodami pod 4 000 eurow brutto maja po woli zwjazkoweho socialneho ministra Hubertusa Heila (SPD) přichodnje „socialny klimowy pjenjez“ dóstawać. Wupłaćić chcedźa pjenjezy po móžnosći wot lěta 2023 jónu wob lěto, zo bychu přiběrace płaćizny energije wurunali, Heil nowinarjam připowědźi. Nimo toho planuje minister wyše sadźby za rentnarjow, kiž su na zakładne zawěsćenje pokazani. Zeleni, dźěłarnistwo ver.di a paritetiski dobroćelski zwjazk plany Heila witaja. FDP reaguje skeptisce a z městnami wotpokazujo. Unija CDU/CSU namjety ministra zasadnje wotpokazuje.
Mnozy potrjecheni
Porjedźenka
To a tamne (30.05.22)
Zamołwiteho za „pjenježny dešć“ w cyłkownej hódnoće 50 000 eurow w Mainzu je policija wuslědźiła. Po informacijach policije je muž srjedźneje staroby we wysokodomje pjenjezy legalnje wobsedźał. Dalše informacije wo nim a k přičinam njewšědneje akcije njejsu hladajo na škit wosoby zdźělili. Po tym je „wosebite wuwzaćne połoženje“ pjenježny dešć zawinowała. Policija ludźi w tym zwisku namołwja, namakane pjenjezy wotedać. Wot 50 000 eurow, kotrež běchu minjenu póndźelu z wysokodomu na dróhu padnyli, přeco hišće dźěl pobrachuje.
Ručnu granatu z Prěnjeje swětoweje wójny namakał je wobsedźer domu w Hornjej Frankskej. 65lětny bě minjeny pjatk kólnju wurumował a bróń namakał. Specialisća policije ju zrumowachu. Rozbuchadło w njej wjace njebě. Kak bě ručna granata do kólnje přišła, muž njewě.
Jednu hodźinu zachadźał
Uvalde (dpa/SN). Atentatnik Salvador Ramow z texaskeho Uvalde, kotryž je minjenu wutoru na tamnišej zakładnej šuli 19 dźěći a dwě wučerce zamordował, je po oficielnych informacijach něhdźe jednu hodźinu w rjadowniskej stwě zachadźał. Hakle potom su dalše zastojnicy do šule přišli a 18lětneho nadpadnika zatřělili. Mjeztym je w USA znowa wulka diskusija wo krućišich prawidłach hladajo na wobsydstwo brónjow. Dźensa zahaji so lětne zeńdźenje brónjoweje lobby, kotraž je jara mócna a krućiše postajenja wotpokazuje.
Bitwa wo Donbas dale traja
Kijew (dpa/SN). Ukrainski prezident Wolodymyr Zelenskyj starosća so wo wuchod kraja, kotryž Ruska tuchwilu masiwnje nadběhuje. W Donbasu su kónčiny lědma hišće wobsydlene. „Ruska ofensiwa wjedźe k tomu, zo njeje w regionje ani čłowjeka. Města so zniča, wobydlerjo so morja abo wotwjeduja. To je ludomordarstwo“, Zelenskyj wčera wječor we widejowej narěči wuzběhny.
Tesla chce twornju rozšěrić
