Zakituje Borrella
Müller: Ludźom perspektiwu dać
Berlin (dpa/SN). Knježacy wyši měšćanosta Berlina, Michael Müller (SPD), je sej do dźensnišeho wuradźowanja zwjazkoweje kanclerki Angele Merkel (CDU) z ministerskimi prezidentami zwjazkowych krajow wo dalšim postupowanju přećiwo koronawirusej perspektiwy za móžne wolóženja lockdowna žadał. Trěbnje je po jeho měnjenu „sensibelnje postupować na mjeztym wuspěšnym puću, na druhim boku pak tež pokazać, hdy móhło z normalnym žiwjenjom zaso dale hić“, rjekny tuchwilny předsyda konferency ministerskich prezidentow Berlinskim nowinarjam. Při tym měli wšelake scenarije přihotować, zo njeby zaso k přiběracym ličbam infekcijow dóšło. Wosebje mutacije wirusa měli wobkedźbować, Müller potwjerdźi.
Sakska je připowědźiła, zo chcyła wot přichodneje póndźele zaso šulsku wučbu we wobmjezowanej formje zmóžnić.
To a tamne (10.02.21)
Stopy w sněze su paducha w Hamburgu přeradźili. Zastojnicy wuhladachu stopy w předawarni žiwidłow a móžachu jim w čerstwym sněze zwonka twarjena sćěhować. Te wjedźechu policistow skónčnje k 500 metrow zdalenemu wjaceswójbnemu domej. Tam namakachu 22lětneho w swojim bydlenju zhromadnje z runje tak starymaj mužomaj. Na blidźe stejachu štyri bleše Wodki z kupnicy, kotrež zastojnicy jako dopokaz sćazachu.
Masowu karambolažu zawinował je mały koala w Awstralskej. Zwěrjo bě spytało, njedaloko města Adelaide awtodróhu přeprěčić. Při nuzowym borzdźenju je na to pjeć wosobowych awtow do so zrazyło. Rańši powołanski wobchad bě nachwilnje zlemjeny. Nichtó so njezrani. Žonje so poradźi, zwěrjo popadnyć. Koala pak njebě z městnom na zadnjej ławce awta spokojom a sydny so za wodźidło.
Wjele sněha tež w Sakskej
Zymske poměry sej wot šoferow a pomocnikow tójšto wužadali
Lipsk (dpa/SN). Sylne sněhowanje je Sakskej hač do 30 centimetrow sněha tež w nišich kónčinach wobradźiło. Při tym běchu rozdźěle mjez wuchodom a zapadom swobodneho stata dosć wulke. Mjeztym, zo ležeše sněh w Lipsku hač do kolen, nańdźe so na wuchodźe Sakskeje w Hornjej Łužicy „jenož“ hač do 20 centimetrow. Wosebje wjele sněha mějachu tež w Vogtlandskej z hač do 30 centimetrami. Wichorojteho wjedra a wějeńcow dla bě wjedrarjam ćežko, dokładnje rjec, hdźe budźe najwjace sněha, rjekny sobudźěłaćer wjedrarnje Florian Engelmann.
Zamołwita za njewšědne mnóstwa sněha je zražka přewšo zymneho powětra z wuchoda z ćopłym powětrom z juha. „To je wjele sněha produkowało“, rjekny Engelmann. Přichodne dny wostanje wjedro zymske ze sylnymi zmjerzkami. Wodnjo njestupaja temperatury nad sydom stopnje zmjerzka, w nocy spadnje temperatura pod dźesać stopnjemi minusa, wjedrarjo zdźěleja.
Kretschmer: Ćeńki lód
Drježdźany (dpa/SN). Sakski ministerski prezident Michael Kretschmer (CDU) je hladajo na wulke wočakowanja na bórzomne zběhnjenje wobmjezowanjow koronawirusa dla k zdźeržliwosći namołwjał. „Hibamy so na ćeńkim lodźe. Tuž dyrbimy kedźbliwi być, zo njebychmy so přełamali“, rjekny sakski knježerstwowy šef na wčerawšim internetnym forumje z wobydlerjemi a fachowcami. Sakska je dožiwiła, što so stanje, hdyž so wirus bjez mjezow rozpřestrěwa, wón rjekny.
Zhromadnje přećiwo koronje
London (dpa/SN). Zwjazkowa kanclerka Angela Merkel (CDU) a britiski premierminister Boris Johnson staj w telefonaće wuske zhromadne dźěło w boju přećiwo koronawirusej potwjerdźiłoj. Při tym běštaj sej přezjednaj, zo měło šćěpiwo přećiwo wirusej ludźom po wšěm swěće přistupne być. Wobaj běštaj sej wěstaj, zo je bój přećiwo koronawirusej hišće „dołhi a wobćežny puć“.
Woheń w milinarni
Ukraina hněwna na Steinmeiera
Berlin (dpa/SN). Zwjazkowy prezident Frank-Walter Steinmeier je ze swojimi wuprajenjemi k wjele diskutowanemu płunowodej Nord Sream II w Ukrainje hněw zbudźił. „Dwělomne historiske argumenty“ Steinmeiera su w Kijewje „ze spodźiwanjom a rozhorjenosću“ na wědomje brali, piše ukrainski wulkopósłanc w Berlinje, Andrij Melnyk, w pisomnym stejišću, kotraž powěsćerni dpa předleži.
Steinmeier bě w rozmołwje z nowinarjemi Nord Stream II jako posledni zwostawacy móst mjez Němskej a Ruskej zakitował. Wón pokazuje zdobom na historiske dimensije, na kotrež njesměli zabyć, kaž na nadpad Němskeje na tehdyši Sowjetski zwjazk z wjace hač 20 milionow sowjetskimi woporami. „Wuprajenja Steinmeiera su nas Ukrainjanow hłuboko do wutroby trjechili“, Melnyk piše.
Unija pozhubja přichilnosć
Planuja podlěšenje lockdowna
Hamburg (dpa/SN). Wyši měšćanosta Hamburga, Peter Tschentscher (SPD), je so za podlěšenje wobstejacych naprawow přećiwo koronawirusej wuprajił a zwjazkowe kraje k jednotnemu postupowanju namołwjał. Wolóženja su hakle móžne, je-li jasne, kajki wliw mutacije wirusa na cyłkowne połoženje infekcijow maja, rjekny Tschentscher Hamburgskim nowinarjam. Wón apelowaše na swojich kolegow w druhich zwjazkowych krajach, na jutřišim widejowym wuradźowanju ze zwjazkowej kanclerku Angelu Merkel (CDU) „za jedyn postronk ćahnyć“, zo njeby so pozitiwne wuwiće hladajo na ličby nowych infekcijow lochkomyslnje na hrački stajiło.
Po informacijach medijow je předwidźane, tuchwilne wobmjezowanja hač do 1. měrca podlěšić. Potom měli zwjazkowe kraje samostatnje rozsudźić, w kajkej měrje smědźa wobchody, hosćency a frizerske salony zaso wotewrěć.
Šule maja najebać to wot 15. februara z krutymi hygieniskimi naprawami a wučbu w změnach zaso wuwučować.
To a tamne (09.02.21)
Stopy w sněze su muža přeradźili, kiž je šofera taksija wo swoje pjenjezy wobšudźił. Muž bě šofera taksija prosył, skrótka při tankowni pozastać, zo móhł sej cigarety kupić. Město toho pak so wón zminy. Přiwołani policisća pak njetrjebachu dołho pytać. Slědy w sněze wjedźechu zastojnikow direktnje k durjam domu, w kotrymž podhladny bydleše. 20lětnemu napisachu skóržbu.
Ze sněhowym suwakom w ruce je so 55lětna žona w Durinskej do sobuwobydlerki dała. Kaž policija zdźěli, so 62lětna při tym snadnje zrani, nawoči so rozłamachu. Prawdźepodobnje njejstej so dojednać móhłoj, štó z njeju ma kelko sněha suwać. Policija přepytuje snadneho ranjenja ćěła dla. Nadrobnosće zwady w Sömmerda njeběchu spočatnje znate. Pječa njejstej so žonje wosobinsce znałoj.
Bamž planuje jězbu do Iraka
Vatikan (B/SN). Bamž Franciskus chce najebać wobmyslenja do Iraka lećeć. „Tež hdyž budźe mje wjetšina Irakčanow pandemije dla jenož w telewiziji sćěhować móc, móža woni začuwać, zo je bamž mjez nimi“, rjekny pontifeks w rozmołwje ze žurnalistami we Vatikanje. Hižo Jan Pawoł II. bě so w lěće 2000 nadźijał, zo móže Irak wopytać. Politiskich napjatosćow dla pak jězbu njenastupi. Franciskus nochce tamnišich ludźi znowa přesłapić. „Hdyž ćerpja, jich tróštujemy“, wón wuzběhny. We wobłuku wopyta wot 5. do 8. měrca chce so swjaty wótc na mjezynabožnym modlenju z křesćanami, muslimami, židami a dalšimi wobdźělić.
Zběraja pjenjezy za Etiopisku
Erfurt (B/SN). Wołanje za pomoc kardinala Souraphiela, arcybiskopa Addis Abeby, a Petrosa Bergi, kiž socialne projekty na městnje rjaduje, zbudźi darjensku akciju Erfurtskeho biskopstwa. W slumach a předměstach Addis Abeby, stolicy Etiopiskeje, maja so wutworić wuměnjenja za myće rukow. Darowanska akcija započa so w adwenće a dale traje. Dotal su 3 800 eurow nazběrali.
Židźa nětko wěsćiši
