Berlin (dpa/SN). SPD chcyła, zo móhli starši ludźo w padźe bjezdźěłnosće widźomnje dlěje bjezdźěłnostny pjenjez dóstać hač dotal. Tole je dźěl žadanjow předsydki strony Andreje Nahles za „Reformu socialneho stata 2025“, z kotrejž chcyła wona wjele diskutowane zakładne zawěsćenje Hartz IV z „wobydlerskim pjenjezom“ narunać. „Wot staroby 50 lět chcemy lěta, w kotrychž su ludźo přinoški płaćili, hižo bóle připóznać hač dźensa“, rjekny předsydka nowinarjam. „Štóž je 58 lět stary, smě dźensa 24 měsacow bjezdźěłnostny pjenjez I dóstać. Tutu dobu­ chcemy na 33 měsacow podlěšić, w jednotliwych padach samo na 36 měsacow.“ Nastawace přidatne kóšty móhło po jeje měnjenju bjezdźěłnostne zawěsćenje přewzać. „Jeje kasy su połne, pjenjezy tu su“, wona rjekny. Dotal dyrbja potrjecheni po kóncu doby přijimowanja bjezdźěłnostneho pjenjeza I próstwu wo Hartz IV zapodać. CDU ma namjet SPD hladajo na dobre połoženje na dźěłowych wikach za „wopačny signal“.

Berlin/Bratislava (dpa/SN). Zwjazkowa kanclerka Angela Merkel (CDU) je so dźensa do słowakskeje stolicy Bratislavy podała, zo by so z ministerskimi prezidentami Pólskeje, Čěskeje, Madźarskeje a Słowakskeje zetkała. Oficialna přičina je 30lětna róčnica powalenja Berlinskeje murje. Politiski přewrót w krajach tak mjenowaneje Visegrádskeje štyrki je „wuznamnje“ k měrniwemu znowazjednoćenju Němskeje přinošował, zwjazkowe knježerstwo zdźěli. Słowakska Visegrádsku skupinu tuchwilu nawjeduje.

Zwjazkowu kanclerku wočakowaše spočatnje słowakski ministerski prezident Peter Pellegrini, popołdnju słowakski prezident Andrej Kiska. Poćahi Němskeje k wuchodoeuropskim čłonam EU, wosebje k Madźarskej a Pólskej, su napjate. Kraje kritizuja politiku Němskeje ćěkancam napřećo. Zetkanje w Bratislavje móhło tež tohodla zajimawe być, dokelž wotměje so we Waršawje za něšto dnjow wjele diskutowana wot USA organizowana konferenca wo Bliskim wuchodźe, kotraž měri so předewšěm přećiwo Iranej.

Dołho je trało, ale nětko je drje tak daloko: SPD je spóznała, zo so dźěłowične reformy bywšeho zwjazkoweho kanclera Gerharda Schrödera (SPD) z lěta 2004 hač do dźensnišeho politisce wuskutkuja, a to předewšěm na njedobro strony. Ludźo njejsu zabyli, kak hrubje je Schröder swój čas – zhromadnje ze Zelenymi – socialne zasady socialdemokratiskeje strony ranił. Naraz bě móžno, za jedyn euro wob hodźinu dźěłać, jako požčeny dźěłaćer połojcu toho zasłužić, štož ma kruće přistajeny kolega při pódlanskej mašinje abo z wonym ponižacym systemom Hartz IV žiwy być dyrbjeć. Dotal pak so nichtó chutnje na to zwažił njeje, tole změnić. Myslmy na kanclerskeho kandidata SPD Martina Schulza, kiž bě ze swojimi předstawami wo wjetšej socialnej sprawnosći spěšnje zwrěšćił, dokelž nochcyše njesprawnosć wotstronić. Njewěm, hač móže SPD wolerjow nětko přeswědčić. Na kóždy pad je wona na prawym puću. Marko Wjeńka

Mjaso wjewjerčkow poskićuja wot najnowšeho w hosćencu w Londonskej korčmowej štwórći Borough Market. Hosćenc „Native“ spřihotuje hosćom nimo lokalnych jědźow tež lasanju z ragoutom wjewjerčkoweho mjasa. Na taler přińdźe pak jenož mjaso šěrych wjewjerčkow. Zwěrjata běchu kónc 19. lětstotka z Ameriki přiwjezli. Mjeztym wohrožuja wone populaciju čerwjenych wjewjerčkow na britiskej kupje. Ludźom su wone kwakla.

Preč ćisnjena seks-klanka je na awtodróhowym parkowanišću w Posaarskej zasadźenje policije zawinowała. Naha klanka ze zawjerćanymaj rukomaj a nohomaj wupadaše w ćmě woprawdźe kaž čłowjeske ćěło, policija zdźěli. Wotpowědnje wustróžana reagowaše žona a zawoła policiju. Prjedy hač zastojnicy přijědźechu, móžeše žona zhromadnje ze šoferom nakładneho awta „kriminalny pad“ rozrisać.