Smy wosrjedź zymskich prózdnin, tajke prawje zymske začuća pak při­wšěm nimam. Runje skerje za nalěćom wupada. Tak poda­wa so tójšto Serbow do horow, zo bychu znajmjeńša tróšku sněha dožiwilio. Hdyž pomyslu, zo móhło to wšo sněh być, štož je so nam w zašłych tydźenjach na dešću našło.

W južnotirolskim Antholzu wšak mó­žemy sej wšědnje napjaty zymski sport – biatlon – wobhladać. Swětowe mišterstwa započachu so štwórtk hnydom z překwapjenku. 3. městno wubědźichu sej sportowcy ze susodneje Čěskeje. Tež w času po Gabrieli Koukalovej maja tam dobrych biatletow, kotřiž stajnje zaso cyle prědku sobu wo městna wojuja. Wčera nasta přewšo napjate přesćěhowanje. Za mnje je to wosebje putaca disciplina, wšako móža tam sportowcy zaso swój zastatk wot sprintoweho wubědźowanja do toho nachwatać. Při tym wuskoči prěnja medalja za Němsku. Denise Herrmann pokaza, kajka dobra sportowča je. Jej wšak leži skerje smalenje po čarach hač třělenje. Do biatlona bě Herrmann mjenujcy sněhakowała, a to po dołhich čarach.

Kopańca, wokrjesna wyša liga

Kulow – Kinspork/Łužnica 2:1 (1:0)

1. Póst Germania Budyšin 15 43 : 21 36

2. Drohotka Ramnow 15 40 : 22 35

3. Módro-běli Kulow 16 33 : 21 32

4. ST Horni kraj-Sprjewja 15 42 : 23 29

5. LSV Hory 15 35 : 24 29

6. Sokoł Ralbicy/Hórki 15 29 : 30 23

6. ST Hnašecy-Dobruša 15 29 : 30 23

8. Wojerowski FC 15 40 : 34 18

9. TSV Wachau 15 33 : 31 18

10. SG Großnaundorf 15 27 : 31 17

11. TSV Połčnica 15 28 : 44 17

12. ST Kinspork/Łužnica 16 19 : 25 15

13. ST Marijina hwězda 15 27 : 37 15

14. Natwar Němske Pazlicy 15 21 : 32 13

15. Motor Kumwałd 15 32 : 43 10

16. ST Porchow 15 13 : 43 10

wokrjesne pokalne koło – štwórćfinale

Wjazońca – Wachau 0:3 (0:2)

Kinspork/Łužnica II – Kubšicy 1:2 (1:1)

Sokoł Ralbicy/Hórki – Horni kraj 1:4 (0:1)

Großnaundorf – Ramnow 4:2 (1:0)

Ze štwórćfinala do połfinala

Wosom koparskich cyłkow wojuje jutře, sobotu, a zajutřišim, njedźelu, w pokalnym kole Zapadołužiskeho koparskeho zwjazka WFV wo zaćah do koła najlěpšich štyrjoch mustwow. Mjez nimi je z prěnim koparskim cyłkom Sokoła Ralbicy/Hórki tež hišće serbske mustwo.

15.02.  13.00  TSV 90 Wjazońca –

  TSV Wachau

16.02.  13.00  ST Kinspork/Łužnica II –   ST Kubšicy

16.02.  13.00  Sokoł Ralbicy/Hórki –

  ST Horni kraj-Sprjewja

16.02.  13.00  SZ Großnaundorf –

  Drohotka Ramnow

Energija a Worjoły hraja wo dypki

Prěnje koparske mustwo Módro-běłych Kulow budźe jutře dypkowu hru we wo­krjesnej wyšej lize nachwatać, a to we Wojerecach na kumštnym trawniku w Jahnowym stadionje. Wot 13 hodź. wočakuja Worjoły cyłk sportoweho towarstwa Kinspork/Łužnica. Z dobyćom móhli so Kulowčenjo w tabulce wo dwě pozi­ciji na třeće městno polěpšić. Poł hodźi­ny pozdźišo kopa w regionalnej lize sewjerowuchod FC Energija Choćebuz přećiwo FC Viktoriji Berlin.

Přihotowanske koparske hry

15.02. 14:00  Biskopičanske KT II –

  SJ Chrósćicy

16.02.  14:00  FSV Bretnig-Hauswalde –

  SJ Chrósćicy II

16.02.  14:00  ST Hnašecy-Dobruša –

  ST 1922 Radwor

Dorostowa wubranka hraje

Ralbičanscy Sokoljo na halowym parkeće we Wojerecach třeće městno wobsadźili

Kóžde lěto přewjedźe Zapadołužiski koparski zwjazk (WFV) wokrjesne halowe koparske mišterstwa w starobnej klasy nad 35 lětami. Ličba mustwow bě dotal na wosom cyłkow wobmjezowana. Hrajne zjednoćenstwo Rakecy/Šćeńca, mišter z lěta 2019, pak bě so prawdźepodobnje přepozdźe přizjewiło a wšitke wosom startowych městnow běchu wobsadźene. Zwjazk poda Rakečanam móžnosć hišće dalše mustwo namakać, tak zo bychu turněr wuwzaćnje z dźesać zastupnistwami přewjesć móhli. K tomu pak njepřińdźe a koparjo HZ Rakecy/Šćeńca wostachu doma.

Nowy mišter wuhra so w dwěmaj staflomaj. Kóžda partija traješe 12 mjeńšinow a prěnjej dwě mustwje kwalifikowaštej so za połfinale, kotrež so přez křiž wuhra. Tež za zadnje městna hrajny system płaćeše, tak zo měješe kóžde mustwo pjeć hrow absolwować. Zadnje městna w tutym modusu wuhrać pak žněješe kritiku, dokelž so turněr njetrjebawšo do dołhosće ćehnješe.