Minister Thomas Schmidt w Delnjej Kinje na dźěłowej rozmołwje był

Delnja Kina (SN/BŠe). Wotmołwu na w martrownym tydźenju přewjedźenu demonstraciju w Budyšinje dóstachu wčera zastupjerjo burow. Do ratarskeho zawoda w Delnjej Kinje bě na próstwu zapósłanca krajneho sejma Marka Šimana (CDU) přijěł sakski minister za wobswět a ratarstwo Thomas Schmidt (CDU). Hłownje dźěše wo to, ministrej na dźěłowym městnje ratarjow wuswětlić jich tuchwilne dramatiske połoženje přeniskich płaćiznow wudźěłkow dla. Do toho pak pokaza jemu Johannes Pietschmann z předsydstwa agrarneho zawoda Budissa nowy chlěw za prosata, kotryž běchu 20. meje wotewrěli. Pod najmodernišimi wuměnjenjemi plahuja tam 3 500 prosatow. Ale što pomhaja tajke wuměnjenja, hdyž so dźěło ratarjow wotpowědnje njehódnoći a na wikach płaćizny za jich wudźěłki dale a bóle spaduja. „Dyrbimy struktury na wikach změnić“, podšmórny Thomas Schmidt. Burja su w stajnym kołoběhu płaćiznow. Rjećaz wot produkcije přez zrěčenja z wikowarjemi hač ke kónčnym poskitkam na wikach měł so přeměnić.