Solarny katamaran wot soboty mjez Złym Komorowom a Lejnom po puću
Lejno/Zły Komorow (SN/JaW). Łužiska jězorina ma dalšu atrakciju: łódźniski zwisk mjez Lejnom a Złym Komorowom. Wot soboty jězdźi tam solarny katamaran z mjenom „Aqua Phönix“. Hakle krótko do prěnjeje jězby na čarje ze Złokomorowskeho jězora přez Košynjanski kanal do Lejnjanskeho jězora su turistisku łódź po starodawnej tradiciji ze sektom wukřćili. Nimo přitomneho wódneho muža, kotrehož předstaji Günter Kalliske, přewza tónle nadawk na přeće młodeje předewzaćelki a mějićelki łódźnistwa Marianny Löwa, jeje wowka. Solarny katamaran jězdźi wotnětka wšědnje dwójce krajnu mjezu Braniborskeje a Sakskeje překročacu liniju wot Złeho Komorowa do Lejnoho a wróćo.