Štyridnjowski politiski forum Łužica młodych ludźi zjednoćił

Slepo (AK/SN). Nuznje trěbna strukturna změna we Łužicy radźi so jeničce w mjezsobnosći městow a gmejnow. „Kóžda komuna měła swoje sylnosće wutwarić. Jeno­ zhromadnje móžemy něšto pohibować“, podšmórny Mužakowski měšćanosta Andreas Bänder (CDU) wčera na po­dijowej diskusiji „Region přichoda Łužica“ w Slepjanskim kubłanskim centrumje. Diskusija bě dźěl štyridnjowskeho Politiskeho foruma Łužica. Hesło rěkaše „Politika(r) k zrozumjenju/dótknjenju“. Z partnerami, kaž ze Sakskej krajnej centralu za politiske kubłanje a zwjazkowymi zapósłancami regiona, je kubłanski centrum na forum přeprosył. Tón měrješe so předewšěm na šulerjow a dobrowólnych Zwjazka ze Sakskeje a Braniborskeje. „Chcemy młodostnych a zapósłancow hromadu wjesć. Nam dźe wo transparencu w politice“, rozjasni pedagogi- ski nawoda a sobuorganizator Falk Pfeiffer. „Chcemy młodostnych zmužić so wšědnje do politiki měšeć.“