Geotechnisku wěstotu na nawisach a nasypnišćach docpěć bě sobu hłowny nadawk Łužiskeje a srjedźoněmskeje towaršnosće hórnistwoweho zarjadnistwa (LMBV) w lěće 2016.
Zły Komorow (SN/at). Łužiska a srjedźoněmska towaršnosć hórnistwoweho zarjadnistwa je lětuše saněrowanske zaměry w dalokej měrje docpěła. To zdźěli jeje nowinski rěčnik dr. Uwe Steinhuber na naprašowanje Serbskich Nowin. Su to wukony we wobłuku brunicoweho saněrowanja za cyłkownje nimale 252 milionow eurow. 183 mio. eurow nałožichu za saněrowanske dźěła, něhdźe 58 mio. eurow za naprawy přećiwo stupacej dnownej wodźe. Za jědnaće milionow eurow spjelnichu nadawki, z kotrymiž ma so standard dalšeho wužiwanja w saněrowanskej kónčinje zwyšić.
