Wojerecy (AK/SN). Krajej přesahowacy turistiski zwjazk Łužiska jězorina je nowy wobhospodarjer turistiskeje informacije we Wojerecach. Na stejnišću wobydlerskeho centruma Piwarska 1 ma so wona na informaciski a serwisowy centrum za turistow wuwić. Personal dotalneho zarjadnišća je wostał, podružne zrěčenje z wotnajerku kulturnej fabriku płaći wot 1. januara, podšmórny jednaćelka turistiskeho zwjazka Kathrin Winkler wčera na wotewrjenju noweho domicila.
Při zachodźe informuja wobrazowki wo łužiskej jězorinje. Wosrjedź rumnosće steja tři prezentaciske kóstki. „Tam móža so poskićerjo předstajić. Móžne temy su stawizny a nastaće łužiskeho laneho wolija abo šiće narodneje drasty“, rozłoži nawodnica informacije Laura Schmidt z Kamjenca. Jej poboku stej sobudźěłaćerce Anja Heeger z Wojerec a Nathalie Kajunke z Łutow. Jim přidruži so přichodnje Wojerowčanka Ulrike Schwender.
