Ličba přenocowanjoww Hornjej Łužicy je loni w jednotliwych kónčinach chětro chabłała. Mjeztym zo zličichu w Mužakowje 21,3 procenty wjac, běštej jich po cyłym Budyskim wokrjesu 9,2 procentaj mjenje hač lěta 2015.

Budyšin (SN/BŠe). W lěće 2016 zličichu turistikarjo w Hornjej Łužicy 679 719 hosći, štož je přirost 2,1 procenta. Ličba přenocowanjow pak wo 1,7 procentow woteběraše. „Ležimy jasnje pod přerězkom tamnych sakskich kónčin“, zdźěli dźensa projektowa managerka Marketingoweje towaršnosće Hornja Łužica-Delnja Šleska (MGO) Franziska Diessner na nowinskej rozmołwje w Budyšinje. Přiwšěm su w regionje jasne rozdźěle. Tak zličichu loni w Mužakowje 21,3 procenty wjace přenocowanjow. Konkretna přičina přirosta pak dotal jasna njeje. Poskitki kołowokoło wjercha Pücklera po wšěm zdaću hosći přiwabjeja. Pozitiwna tendenca so tež we wšelakich turistiskich wobłukach wotbłyšćuje.