Roland Ermer je kandidat CDU za Budyski wólbny wokrjes 156 a nastupi 24. septembra k 19. wólbam zwjazkoweho sejma. Wčera zetka so wón z čłonami Zwjazka serbskich rjemjeslnikow a předewzaćelow (ZSRP) w Lejnje.
Lejno (SN/BŠe). Roland Ermer (CDU) je pjekarski mišter, pochadźa ze srjedźneho stawa a zastupuje tuž jeho ideale. Wo tym móžachu so čłonojo ZSRP přeswědčić, kotřiž su wčera w Lejnje diskusiju z nim dožiwili. „Srjedźny staw su předewzaćeljo a rjemjeslnicy – stołp towaršnosće“, Ermer podšmórny. W zašłosći njeje politika jich zajimy wobkedźbowała, ale jim dźeń a wjac wobćežnosćow nabrěmjeniła.