Plahowarjam sadu z městnami płody zmjerznyli

Kašecy/Rachlow/Budyšin (SN/BŠe). Zmjerzk w aprylu a spočatk meje je plahowarjam sadu škody zawinił. W kotrej dimensiji, njehodźi so tuchwilu hišće rjec, zdźěli mějićel Kaščanskich truskalcowych polow dr. Christian Bock na naprašowanje Serbskich Nowin. „Jako běchu prěnje kćenja truskalcowych rostlin zmjerznyli, smy je z hoberskim nałoženjom z foliju pokryli“, wón wuswětli. Tohodla njejsu škody při zažnych družinach płodow přewulke. Štož pozdźiše družiny nastupa, njeje hišće jasne, hač je jim zmjerzk scyła zeškodźał. Přiwšěm so tež lětsa žně pozdźišo zahaja. „To drje nětko wot wjedra wotwisuje. Donětka liču­ z tym, zo móžemy wot 22. meje prěnje płody žnjeć započeć, štož je něhdźe tydźeń pozdźišo hač poprawom před­widźane“, plahowar sadu rozłoži. Folije na rostlinach dla wšak njemóžachu pčołki swój nadawk hižo tak derje spjelnić. Tak bě jenož dźělne popróšenje móžne, płody móhli tuž tu a tam trochu deformowane być. Słód truskalcow pak wo­stanje.