Dowolnosć, wjelka z Róžeńčanskeje črjódy zatřělić, hódnoća mnozy jako wuspěch. Přiwšěm su sej přećiwnicy wjelka wěsći, zo je to jenož prěnja kročel. Scyła ma so, wobstatk tychle rubježnych zwěrjatow wobmjezować.

Budyšin (SN/BŠe). „Skónčnje“, tak rěka reakcija wowčerjow w Róžeńčanskej wokolinje, hdźež tamniša wjelča črjóda prawdźepodobnje zachadźa. Sakske ministerstwo za wobswět a přirodoškit je dowoliło wjelka z črjódy zatřělić. „Jedyn abo wjacore wjelki su po wšěm zdaću nawuknyli, poručene zawěsćenske naprawy za plahowarjow wowcow wobeńć“, wobswětowe ministerstwo zašły pjatk zdźěli. Spjelnjene su tuž wuměnjenja za próstwu Budyskeho krajnoradneho zarjada, kotrež bě wo dowolnosć prosyło wjelka zatřělić. Naprawa pak je hač do kónca nowembra wobmjezowana a płaći jenož, hdyž so wjelk zawěsćenemu wowčemu stadłu bliži. Ministerstwo nadźija so wuknjenskeho efekta za cyłu črjódu, hdyž jedne zwěrjo z njeje zatřěla.