Předewzaća w Hornjej Łužicy trjebaja fachowe mocy. Zo móža to tež ludźo z handicapom być, njebě minjene lěta samozrozumliwe. W Budyskej agenturje za dźěło pak wobkedźbuja po zdaću změnu trenda. Wšako chce najwjac ćežkozbrašenych dźěłać, hustodosć su tež kwalifikowani.
Budyšin (CK/SN). W Hornjej Łužicy je spočatk noweho lěta 1 297 bjezdźěłnych ludźi z handicapom, 41 mjenje hač loni w samsnym času. „Dlěši čas njeje tale skupina wosobow žadyn podźěl na pozitiwnym wuwiću hornjołužiskich dźěłowych wikow měła“, rozłožuje Thomas Berndt, šef agentury za dźěło w Budyšinje. Přeco hišće su předsudki a wobmyslenja nastupajo ludźi ze zbrašenjom.
Hladajo na přiběracu potrjebu fachowych mocow pak zwěsća Thomas Berndt nětko po zdaću změnu trenda. Dźeń a bóle spóznawaja dźěłopřijimarjo potencial tejele skupiny wosobow. To pytnješ na rozmołwach. Loni bě 305 bjezdźěłnych ćežkozbrašenych mjenje registrowanych hač 2015. Nimo toho wupokazuje statistika za minjene lěto 2 185 naprawow, zo bychu so zbrašeni na dźěłowych wikach wobdźělili.
