Choćebuz (hlo/SN). „Mnóstwo wopytowarjow njeje wažne, ale kwalita rozmołwow.“ Škodowski předewzaćel Roland Papprot wě, wo čim rěči. Ze swojim fachowym wikowanjom za špundowanja a přisłušk je so wón kónc tydźenja dźesaty raz na Choćebuskej rjemjeslniskej přehladce wobdźělił, za čož počesćichu jeho organizatorojo ze Slěbornym dypornakom. Swoje posłužby je Papprot znowa na zhromadnym stejnišću Serbskich rjemjeslnikow a předewzaćelow (ZSRP) w hali předstajił a bě z wothłosom jara spokojom. Wopytowarjo zajimowachu so wosebje za nowosće w tym wobłuku.