Suche a horce wjedro zawinuje we Łužicy niłke wodźizny. Sakski krajny zarjad za wobswět, ratarstwo a geologiju aktualne hódnoty tydźensce zestaja. Hižo wot apryla wobkedźbuja dźeń a niši staw wody w rěkach. Šansy, swoje rezerwy napjelnić, su dale snadne.

Drježdźany/Budyšin (SN/BŠe). We łužiskich rěkach, hatach a jězorach wostanje dale mało wody. To wěšća fachowcy, kotřiž situaciju wodźiznow w Sakskej wobkedźbuja. Zakład wobličenjow tworja wězo spadki a wjedrowe prognozy, kotrež jim Němska meteorologiska słužba po­srědkuje. Tak wěšćachu dźensa, štwórtk, suche wjedro z temperaturami mjez 28 a 31 stopnjemi. Jutře mamy z jednotliwymi zliwkami a njewjedrom ličić. Přewažnje pak ma kónc tydźenja sucho wostać. Tak su šansy, wodowe rezerwy zaso napjelnić, dale snadnuške.