Statny lěsniski zawod liči z najhubjeńšim lětom wot časa zapisowanja
Budyšin (SN/BŠe). Přestrjeń lěsa w Hornjej Łužicy wučinja cyłkownje 123 154 hektarow. Z toho je najwjetši dźěl, něhdźe 80 000 hektarow, w priwatnym wobsydstwje. Najwjac mějićelow ma mjez jednym a pjeć hektarami lěsa na starosći. Lěto 2018 bě za nich wurjadnje ćežke lěto. Orkan Friederike, kiž w januarje howrješe, je wulke škody zawostajił. Hač do dźensnišeho na mnohich městnach, kaž mjez Šunowom a Tradowom, spowalane štomy leža. Tež suchota je w lěsach widźomna. Lětsa maja skórniki tuž idealne wuměnjenja so rozmnožić.
