Wokrjes na třeći fachowy dźeń kolesowanskeho wobchada přeprosył

Stróža (SN/BŠe). Budyski wokrjes zaměrnje kolesowarske šćežki wutwarja. Zaměr je, po přestrjeni najwjetši wokrjes Sakskeje nic jenož turistisce, ale tež za wšědnu potrjebu kolesowanja přihotować. Tuž přewjedźe wokrjesny wuwićowy zarjad zawčerawšim třeći fachowy dźeń kolesowanskeho wobchada. Mjeztym zo běštej prěnjej dwě zarjadowani w Biskopicach, pobychu tónkróć w Stróžanskim Domje tysac hatow. Přeprošenje měrješe so na sobudźěłaćerjow městow a gmejnow kaž tež na organizacije a na dalšich akterow turistiskich gremijow. Tež wjesnjanosta Ralbičansko-Róžeńčanskeje gmejny Hubertus Ryćer (CDU) bě mjez wobdźělnikami. „Kolesowarske šćežki hraja w našej gmejnje wažnu rólu, wšako prěkuja kónčinu Krabatowy kolesowarski puć abo čaru Łužiske impresije. Kak mamy je wudźeržować a wuhotować, je tuž stajnje tema. Nastorki ze zarjadowanja budźemy mjez kolegami wuhódnoćić. Snano móhli so tež z tamnymi wjesnjanostami wuměnjeć“, wón wuswětli.