Zakładne zrěčenje wo Miłorazu podpisali
Miłoraz (AK/SN). Cyłkownje 642 lět po załoženju słowjanskeho sydlišća Miłoraženjo swoju domiznu spušća, štož je za nich wulki wopor. Hač do kónca lěta 2024 ma přesydlenje na sewjer Slepoho při Dźěwinskim puću zwoprawdźene być.
„Hakle nowa domizna budźe nas wučić, što na Miłorazu mějachmy. Nadźijam so, zo so wjes na nowym stejnišću tak wuwije, kaž ju znajemy“, podšmórny wjesnjanosta Waldemar Locke (CDU) wčera něhdźe 100 wobydlerjam a hosćom. Zhromadnje z ministerskim prezidentom Sakskeje Michaelom Kretschmerom (CDU) a krajnym radu Zhorjelskeho wokrjesa Berndom Langu (CDU) su na žurli hosćenca „K wotpočinkej“ zakładne zrěčenje wo přesydlenju podpisali. Na to dojednali běchu so nawoda předsydstwa koncerna Łužiska energija a milinarnje (LEAG) dr. Helmar Rendez, nawoda hórniskeho wobłuka LEAG Uwe Grosser, Trjebinski wjesnjanosta Waldemar Locke a wjesnjanosta gmejny Slepo, hdźež so wjetšina Miłoražanow zasydli, Reinhard Bork (wobaj CDU).