LEAG přihotuje twar noweje spalernje wotpadkow w Janšojcach

Choćebuz (SN/at). Koncern Łužiska energija hórnistwo a milinarnje AG (LEAG) chce so na přichod nastajić a planuje twar noweje spalernje wotpadkow w susod­stwje Janšojskeje milinarnje. Kaž z nowinskeje zdźělenki předewzaća ze spočatka měsaca wuchadźa, „přihotuja po­d­łožki za přizwolensku proceduru“. Hač inwestuja a připrawu twarja, wo tym móhli w lěće 2021 rozsudźić. Tak by LEAG zdobom 50 nowych dźěłowych městnow wutworiła. Z planowanej připrawu hodźeli so kapacity ćopłotneho zwužiwanja wotpadkow na Janšojskim stejnišću perspektiwisce wyše planowaneje doby bruni­coweje milinarnje hač do spočatka 2030tych lět zachować a dobre wuměnjenja za dalše industrijne zasydlenja wutworić, informuje nowinska rěčnica LEAG Kathi Gerstner na naprašowanje.