Turistikarjo nadźijeja so zaso mnohich wopytowarjow

Budyšin (SN/BŠe). Jutry su za Łužicu wusahowacy podawk, kotryž kóžde lěto tysacy turistow z kraja a wukraja přiwabja. „Nałožki kołowokoło jutrow a křižerjow na wosebite wašnje dožiwić móža zajimcy lětsa w Hrubjelčicach“, měni předsyda towarstwa Serbski kulturny turizm (SKT) Pětr Brězan. Tamniši hosćenc „Sprjewiny doł“ a wjesny hotel matej wosebity poskitk wot ćicheho pjatka do jutrownički zestajany. Tak hosćom nałožk rozkładuja a na jeho pozadki skedźbnjeja. Zdobom přihotuja za region typiske kulinariske chłóšćenki. Dale je wopyt w Budyskim Serbskim muzeju předwidźany. Tež přihoty křižerskeho procesiona, kaž rjedźenje gratow atd., chcedźa pokazać. A jutrowničku móža hosćo samo wužohnowanje křižerjow dožiwić a sej křižerske procesiony wobhladać.