Najwažniše projekty – swětłownje předstajili

Běła Woda (SN/BŠe). Sakske knježerstwo žadyn čas njebroji a dźěła z połnej paru na projektach, kotrež měli wuspěšnu strukturnu změnu we Łužicy zmóžnić. Tole wobkrući wčera ministerski prezident swobodneho stata Michael Kretsch­mer (CDU) w Běłej Wodźe. Městnosć wozjewjenja najwažnišich projektow-swětłownjow je derje wolena, wšako su na wuchodźe Łužicy hižo strukturny łamk dožiwili. Město Běła Woda płaćeše jako wažne stejnišćo škleńčneje industrije. W halach zawoda běchu wčera zamołwitym wokrjesa a žurnalistam naprawy zwjazkoweho kraja předstajili. Přiwšěm připowědźi Kretschmer konferencu z inwestorami, kotraž wotměje so 9. meje. Tam póńdźe wo to, předewzaćelam z Badensko-Württembergskeje potenciale Łužicy pokazać a za stejnišćo wabić. ­Porno zwjazkowemu krajej na zapadźe Němskeje ma region na wuchodźe hišće dosć ležownosćow, zo by so rozšěrił.