Chrósćicy/Hózk (SN/BŠe). Wšitke ratarske zawody w kónčinje wokoło Kamjenca a Kulowa su žně žita dokónčili. Po lońšej suchoće z wulkimi stratami wunoškow běchu sej lětsa wjace wočakowali, wšako rěka, zo po hubjenym lěće dobre sćěhuje. Kaž pak z naprašowanja wuchadźa, njejsu so nadźije cyle spjelnili. „Wunošk je lětsa přerězny, zdźěla něšto pod přerězkom“, rozprawja Chróšćanski ratar Roman­ Wjesela a skedźbnja na to, zo su z blakami wulke rozdźěle. W Delanach z pěskojtymi płoninami je so suchota bóle wuskutkowała hač na polach w Horjanach. Pěsk njemóže wodu derje składować, štož začuwa tež Domanic ratarski zawod w Hózku. Wunošk žitnych žnjow je pod přerězkom, zelenina na polach je so­ hubjenje wuwiła. Tež spadki běchu z blakami jara rozdźělne. Wosebje horcej tydźenjej w juniju z temperaturami hač do 40 stopnjow pak stej wutworjenje zorna wobwliwowali. Jeho kwalita burow njespokoja.